VOV4.K’ho- Drim ngai 11/02, Ƀộ Ngoại giao Việt Nam bơyai lơh Pơrjum mpồl ASEAN bè pơgồp bal cribơyai cau ùr, ring lơngai mờ lơngap lơngai tàm ală tơngume tờm mpồl bơtiàn ASEAN jat broă lơh pơrjum tơn mờ pờ tơlik tàm internet. Do là broă kuơmàng nàng kờñ pơn jat tai tàm pơ dờn ală broă lơh ngan tơnguh broă cribơyai cau ùr, ring lơngai mờ lơngap lơngai tàm mpồl ASEAN bơh lơgar Việt Nam dê bơh tơngai lơh broă Củ tịc mpồl ASEAN nam 2020. Đơs mut pơrjum, Thứ trưởng Ƀộ Ngoại giao ồng Nguyễn Minh Vũ đơs nền, Việt Nam neh geh uă tă pơgồp ngan ngồn nàng kờñ chồl pràn lam lơh cribơyai bè cau ùr, ring lơngai mờ lơngap lơngai tàm mpồl ASEAN, kuơmàng tàm tơngai lơh Củ tịc mpồl ASEAN nam 2020.

Pơrjum dơ̆ do là bơta tàm pơn jat tai ală broă lơh ngan bơh Việt Nam dê wèt tus crơng gơs mờ lam lơh ngan ngồn ală broă lơh gàr niam gơnoar cau ùr, lơh gơlik bơta niam nàng cau ùr in tus bal tàm ală broă lơh nền, tơnguh gơnoar broă tàm broă bơsong ală bơta aniai mờ bơta lòng pơhìn tus ring lơngai kơ̆ kơljap bơh tiah do dê. Bơh pơrjum, ală kwang bàng kơp kờñ ASEAN geh jòi geh broă lơh pơn jat tai nàng bơt bơtàu broă lam lơh tiah do bè cau ùr, ring lơngai mờ lơngap lơngai mờ ală jơnau kờñ, broă lơh ngan ngồn.

Cau mblàng K’Duẩn