VOV4.K’ho - Drim òr (31/03), tàm Hà Nội geh bơyai lơh dơ̆ pơrjum Dờng Mpồl cau lơh sa kă bro kơnòm să Việt Nam dơ̆ 7, tơngai lơh broă bơh nam 2022 tus 2025 mờ tơngu me “Lam lài tam gơl pa-Bơceh lơh geh kwơ”.

                         Đoàn Củ tịc mpồl cau lơh sa kă bro kơnòm să Việt Nam đơng lam pơrjum dờng

Pơrjum mpồl cau lơh sa kă bro kơnòm să Việt Nam neh tơnguh bơtàu tàm 63 càr, ƀòn dờng, mờ 11 rơbô nă cau. Ală mpồl lơh sa kă bro bơh cau tàm mpồl gam ai broă lơh 3 tơlăk nă cau lơh broă in mờ kờp jơh khà priă geh pah nam rơlao 30 tơmàn dolar Mỹ. Pơrjum dờng neh pồ 153 nă kwang bàng tus bal Ủy ƀan Mpồl cau lơh sa kă bro kơnòm să Việt Nam khoă 7. Tus pơrjum mờ geh jơnau đơng lam tàm pơrjum dờng, Phó Thủ tướng ồng Lê Minh Khái neh pơn jờng ală cồng nha, broă pơgồp bal kwơ màng bơh mpồl cau lơh sa kă bro kơnòm să mờ Mpồl cau lơh sa kă bro kơnòm să Việt Nam tàm tơngai pa do. Tàm tơngai tus, Mpồl cau lơh sa kă bro kơnòm să Việt Nam pal mùl màl là cau dùl hìu bal, tơrgùm bal, tam klăc bal mpồl cau lơh sa kă bro kơnòm să, sền gàr bơta kwơ di pal, di mờ adăt boh lam bơh ală cau lơh sa kă bro kơnòm să dê. Uă bơta, uă broă lơh, tơnguh broă pơgồp bal, tơnguh bơtàu drà kă bro, tam pà bal jơnau tơngit, tơnguh uă bơta pràn bơh ală cau tàm mpồl dê.

Cau mblàng Ndong Brawl