VOV4.K’ho- Nàng kờñ jòi ală broă lơh ngui geh cồng nha bơta pràn, bơta geh ai bơta bơtàu tơngh nhơl chờ càr Kon Tum in đơs is mờ tiah Tây Nguyên in đơs bal, tàm ƀòn dờng Kon Tum tàm poh lài, Ƀộ Văn hoá, Thể thao mờ Zu lịc pơgồp bal mờ Ủy ƀan Ñân zân càr Kon Tum bơyai lơh Pơrjum “Nhơl chờ Kon Tum- Bơta pràn mờ Gơn kơnờm”.

Pơrjum “Nhơl chờ Kon Tum- Bơta pràn mờ Gơn kơnờm” nam 2022 gơgòi gơ jà bơta tus bal bơh mờr 500 nă kwang bàng dê là ală cau ătbồ, cau jak chài lam bồ gah broă lơh do; Tơrgùm ală mpồl, tập đoàn mpồl lơh sa kă bro gah nhơl chờ, hìu năc, rơndeh rơndồ; Kwang bàng tus bơh bàr pe càr tiah đah jum lơgar Lào, tiah đah tô mat tơngai lik lơgar Campuchia geh bal gùng nhàr lơgar mờ càr Kon Tum.

Kwang bàng tus bal pơrjum

Đơs tàm pơrjum, Ƀộ trưởng Ƀộ Văn hoá, Thể thao mờ Zu lịc ồng Nguyễn Văn Hùng đơs nền, Ƀộ mờ ală tiah tàm gùt lơgar gam geh uă broă lơh, jơh nùs lam lơh ală broă lơh nàng lơh wơl broă lơh nhơl chờ tơnơ̆ tơngai gơbàn kòp dờng Kovid-19. Pơrjum “Nhơl chờ Kon Tum- Bơta pràn mờ Gơn kơnờm” là tŭ niam nàng mpồl lơh sa kă bro in tìp măt, lơh kwèng, kĭ hơ lơh broă bal tàm gah broă lơh nhơl chờ. Jăt Ƀộ trưởng ồng Nguyễn Văn Hùng đơs, càr Kon Tum neh geh bàr jơnau kwơmàng nàng bơtàu tơnguh nhơl chờ: Bol añ gŏ geh bàr bơta tờm ngan mờ càr Kon Tum neh mờ bơtòm tơrgùm tơl nàng bol he bơtàu tơnguh nhơl chờ. Bơta lài ngan hơ̆ là Kon Tum geh tơl ală jơnau bè brê bơnơm geh is mờ phan kwơ geh is niam chài nàng bol he lơh nhơl chờ ờ gŏ rơngòt ờ jai mờ ală tiah ndai. Bơta dơ̆ bàr là kòn bơnus Kon Tum mờ nùs nhơm là song dơ pă, song ngan, tơryăng tơryồng lơh broă lơh sa, rềp mềl mờ kis tàm kờñ gơboh bal. Ngan khi là ală cau tờm nàng hoài dŏ cơnđoà jơng lòt bơh năc lòt nhơl dê.

Ƀộ trưởng Ƀộ Văn hoá, Thể thao mờ Zu lịc đơs tàm pơrjum

Tàm pơrjum, ală kwang bàng neh cribơyai, đơs nền bơta pràn mờ bơta gơn kơnờm bơtàu tơnguh nhơl chờ bơh càr Kon Tum dê mờ bơta pơnrơ ngan là rài kis niam chài niam bơnĕ is ngan, uă ù tiah nhơl chờ tiơng pơnrơ ngan, bè: bơnơm Ngọc Linh gơ ơm tàm Tiah sền gàr brê bơnơm geh is Ngọc Linh; sơnĕ pe tiah nhàr lơgar Việt Nam- Lào- Campuchia; tiah nhơl chờ ƀòn brê bơnơm dà lơgar Măng Đen- Kon Plông...Bulah bè hơ̆, nàng bơtàu tơnguh geh nhơl chờ, jăt Phó Giáo sư- Tiến sĩ ồng Trần Đình Nguyên, là cau jak chài gah lơh sa, lài do là Kwang ătbồ Viện Lơh sa lơgar Việt Nam dê, den bal mờ broă sền gàr, prăp gàr bơta kwơ neh geh lài, li la, tơnguh bơngă phan bơna, Kon Tum kờñ pal gĭt nền geh tiah gơguh pràn nàng lời bơta ai lài ai bơtàu tơnguh nhơl chờ in: Kon Tum pal tàm tơrbŏ gùng lòt nàng lơh jồm pràn. Tàm hơ̆ ai pơnyơu bè Ƀờ Y. Kờñ Ƀờ Y gơ par tus geh den Ƀờ Y pal tàm tơrbŏ gùng lòt tus hờ lơgar Lào, pal tàm tơrbŏ gùng lòt tus hờ lơgar Campuchia jăt di bơta gơtha bơh pờ mpồng mŭt gơrờm bal mờ dunia. Tŭ hơ̆, Ƀờ Y hơ̆ sồng ai bơta ƀươn bơh tiah bơyô dê gơ gơs bơta ƀươn bơh he dê nàng tơnguh bơta pràn kis ai nhơl chờ in. Pal jŏ jòng tơrgùm broă dong kờl mờ bơta pràn ai ală anih ai lơh lài in hơ̆ là gĭt tơrgùm tàm bàr pe tiah tờm gơguh pràn. Dùl là ƀòn dờng Kon Tum, bàr là Măng Đen mờ dơ̆ pe là geh dùl gùng lòt tus sơnĕ pe tiah nhàr lơgar.

Tus bal cribơyai tàm sơm băt tê bal bơtàu tơnguh nhơl chờ Kon Tum

Sền song mờ bơta geh ngan ờ pràn jak ngan mơya ờ gŏ di lơh roh bơta pin dờn, mò Trần Nguyện, Kwang ătbồ Ƀan Kă bro Tập đoàn Sun Gruop đơs là, tàm gah broă lơh nhơl chờ càr Kon Tum đơs is mờ Tây Nguyên đơs bal geh uă ngan bơta ờ hềt niam mờ ờ tơl uă ngan bơta, bè phan bơna; Ờ tơl cau bơcri priă dờng; Broă pơlam gùng rơndăp ù tiah; Ờ huan jak bè bồ tơngoh cau lơh broă dê tàm gah nhơl chờ...Mờ dilah kờñ bơtàu tơnguh nhơl chờ den pal bơsong geh ală bơta lòng do: Do là ală bơta mờ tờm ngan, kwơmàng ngan. Dilah kờñ bơtàu tơnguh pal lòt bơsong ală bơta lòng do mờ bol añ kung gơn kơnờm mờ jơnau đơs tă pơgồp bơh bol añ dê mờ bơta lơh lòt bal bơh ală mpồl lơh sa kă bro ndai dê kung geh tă pơgồp ai anih tus Kon Tum in rơhời bơsong geh ală bơta lòng mờ bol he geh jăt bàn tŭ tơngai niam, lòt tơnơ̆ mơya geh lòt mhar ngan”.

Kĭ hơ jơnau ring bal lơh broă bal bơtàu tơnguh nhơl chờ

Tàm Pơrjum “Nhơl chờ Kon Tum- Bơta pràn mờ Gơn kơnờm” nam 2022, Ƀộ Văn hoá, Thể thao mờ Zu lịc yal Broă rơndăp lơh bơtàu tơnguh nhơl chờ tiah Pe mum bơtàu tơnguh Campuchia- Lào mờ Việt Nam tơngai bơh nam 2021- 2025, wèt sền tus nam 2030; Sở Văn hoá, Thể thao mờ Zu lịc càr Kon Tum yal, yal tơngĭt Logo mờ slogan nhơl chờ càr Kon Tum “Lòt sền nàng gĭt bơta niam chài- Lòt sền brê bơnơm geh is”; Kĭ hơ jơnau ring bal lơh broă bal bè dong kờl lơh wơl broă lơh ală mpồl lơh sa kă bro nhơl chờ đah càr Kon Tum mờ Tơrgùm ală mpồl nhơl chờ 3 ƀòn dờng: Hà Nội, Đà Nẵng mờ ƀòn dờng Hồ Chí Minh; Sở Văn hoá, Thể thao mờ Zu lịc càr Kon Tum kung kĭ hơ jơnau ring bal mờ Ală mpồl Nhơl chờ Việt Nam nàng tơnguh khà năc lòt nhơl tus mờ càr Kon Tum.

Cau cih Khoa Điềm- Cau mblàng Lơ Mu K’Yến