VOV4.K’ho- Ngai 27/04, tàm Hà Nội, Ƀộ Quốc phòng bơyai lơh pơrjum pờ tơlik tơn tàm internet bơto pơlam Adat sền gàr tiah nhàr lơgar Việt Nam mờ ală sră nggal cih nền cê. Adat sền gàr tiah nhàr lơgar Việt Nam geh Quôk hội ring bal ngai 11/11/2020, geh mut ngui ngan ngồn mờ lơh jat bơh ngai 1/01/2022. Tàm pơrjum, ală kwang bàng neh geh lơh nền uă tơngume kwơ màng bơh Adat sền gàr tiah nhàr lơgar Việt Nam mờ ală sră nggal cih nền cê lơh jat adat do dê.

Jat hơ̆, Adat sền gàr tiah nhàr lơgar Việt Nam cih tơl làm, wil tơl, ngan ngồn bè sền gàr gơnoar tờm kơnhoàl ù tiah, tiah nhàr lơgar bơh dà lơgar dê. Ngan là cih loh làng kơnòl broă bơh ală kấp, ală ngàñ, mpồl ling phàu crong mờ jơh bal ală anih lơh broă cíñ trị tàm broă bơt bơtàu, atbồ, sền gàr tiah nhàr lơgar bơh dà lơgar dê. Adat kung cih loh Mpồl ling sền gàr tiah nhàr lơgar là dùl tàm ală anih ờs drơng broă sền gàr bơta lơngap lơngai dà lơgar dê tàm tiah nhàr lơgar, geh ngui ală broă lơh kwơ màng nàng sền gàr bơta lơngap lơngai dà lơgar dê jat jơnau sồr.

Cau mblàng K’Hạnh