Drim òr (17/03), tàm Hà Nội, Mpồl cau ùr Việt Nam bơyai lơh Pơrjum mŭt lơh Rơndăp broă “Dong kờl hợp ták xã geh cau ùr tus bal atbồ, ai broă lơh cau lơh broă cau ùr tus nam 2030” (gam sơnđan là Rơndăp broă sồ 01).

Ƀí thư Đảng Dà lơgar, Phó Thủ tướng Cíñ phủ ồng Lê Minh Khái tus bal. Rơndăp broă lơh sồ 01 geh ai jơnau kờñ: lơh niam wơl, dong kờl, tơnguh bơta niam bal mờ cồng nha broă lơh ai rơlao 1 rơbô 500 hợp ták xã, 10 rơbô mpồl lơh broă bal geh ală kấp mpồl dong kờl lơh; 100% cau ùr atbồ bơh hợp ták xã geh bơto broă lơh, bơtơl mờ tơnguh uă bơta pràn atbồ, đơng lam di pal mờ broă lơh sa, kă bro bơh hợp ták xã dê; Pơlam, dong kờl lơh pa 750 hợp ták xã geh cau ùr tus bal atbồ, đơng lam, ai geh uă broă lơh cau lơh broă cau ùr in... Đơs tàm pơrjum, Phó Thủ tướng ồng Lê Minh Khái đơs tờm: Mpồl cau ùr Việt Nam pal rơcang pơgồp bal nền nòn mờ ală Ƀộ, gah lơh broă dà lơgar, ală càr, ƀòn dờng lơh jăt broă rơndăp lơh Rơndăp broă jăt tơl tơngai mờ pah nam; lơh jăt Rơndăp broă sồ 01 di pal, ndrờm bal, geh cồng nha mờ di pal mờ bơta krơi is bơh tơl tiah dê.