VOV4.K’ho- Drim ngai 12/08, Ƀộ Giáo dục mờ Đào tạo bơyai lơh pơrjum tơn jơh nam bơsram 2021-2022, lam lơh kơnòl broă nam bơsram 2022-2023. Pơrjum geh bơyai lơh tơn tàm Hà Nội mờ pờ tơlik tàm internet, mờ 64 anih tàm tơrbŏ bal tàm gùt lơgar.

Nam bơsram 2021-2022, kòp Kovid-19 bơtờp kòp wơl mờ gơlik geh kal ke, gah Bơto bơtê neh rcang tam gơl broă lơh, bơyai lơh bơto bơsram ngăc ngar tơn mờ pờ tơlik tơn tàm internet, gàr niam lơh sir kơnòl broă nam bơsram dê. Jơh gùt gah bơto bơtê bơyai lơh geh cồng nha dơ̆ pơrlòng jơh bơsram kấp pe nam 2022 tàm 1 dơ̆ gàr niam bơta niam mờ ờdo ơdă. Do kung là nam sơnrờp kơnòm bơsram gam bơsram ơdŭ 12 lơh jat broă cih mat dan pơrlòng jơh bơsram kấp pe jat broă lơh pờ tơlik tơn tàm internet tàm ală anih atbồ pơrlòng. Tàm dơ̆ pơrjum, bal mờ bơta sền sơ wì bè ală cồng nha neh lơh geh, ală bơta ờ niam, bơta ờ pràn, jơnau bơsram mờng chài tàm nam bơsram pa do, ală kwang bàng geh cribơyai bè 12 gùng dà broă lơh mờ kơnòl broă tờm tàm nam bơsram pa 2022-2023 mờr tus.

Cau mblàng K’Hạnh