Mho òr (17/09), tàm Hà Nội, Họk viện Cíñ trị Dà lơgar Hồ Chí Minh neh bơyai lơh Pơrjum tơnkah 75 nam ngai bơhiàn ờs mờng bơh Họk viện dê (09/1949-09/2024) mờ dờp Huân cương Lơh broă khà dùl; geh pờ tơlik tàm internet tus mờ ală anih gơwèt bal bơh Họk viện dê.

Tàm pơrjum, Tổng Ƀí thư, Củ tịc lơgar ồng Tô Lâm neh jào Huân cương Lơh broă khà dùl, phan pà kwơ màng bơh Đảng, Dà lơgar ai Họk viên Cíñ trị Dà lơgar Hồ Chí Minh in. Đơs tàm pơrjum, Tổng Ƀí thư, Củ tịc lơgar ồng Tô Lâm sồr, bơ̆t bơtàu Họk viện mùl màl gơs anih lam lài bè broă bơ̆t bơtàu Đảng; lam lài bè grăp gàr bơta niam hìu bơsram, bơta niam broă bơsram sră, anih niam bơto ală bơta niam bơnĕ bơh cau Kộng sản dê; anih nàng bơsram tàp nùs nhơm đảng, bơta niam chài Đảng mờ nùs nhơm cíñ trị kơl jăp ai kwang bàng, đảng viên tus bơsram, bơsram bơtơl tàm Họk viện dê; pơn jăt tai dong kờl, lơh broă bal mờ ală Hìu bơsram cíñ trị nàng gờñ geh khà di pal uă rơlao; lơh gơs broă tơrlòng lơh Họk viện ngăc ngar; prăp gàr mờ lơh geh uă ală bơta kwơ niam bơh bơta niam chài Hìu bơsram Đảng dê tus ală Hìu bơsram Cíñ trị mờ ală hìu bơsram ndai tàm gùt lơgar dê.