VOV4.K’ho- Drim ngai 11/5, tàm Hà Nội geh lơh Pơrjum “Ù tiah tàm internet mờ kơnòl sền gàr tiah nhàr niam chài nùs nhơm cau kơnòm să dê”. Pơrjum pờ tơlik tơn tàm internet tus 63 anih pờ tơlik tơn bơh ală Tỉñ đoàn, Thàñ đoàn tàm gùt lơgar. Tàm pơrjum, ală kwang bàng tơrgùm sền sơ wì bè bơta gơ rềng bơh ù tiah tàm internet dê, ală broă drơng ala gan tiah nhàr dà lơgar gơ wèt tus mờ kơnòl broă sền gàr tiah nhàr niam chài tàm tơngai tŭ do.

Gùt anih pơrjum

Đơs tàm pơrjum, Kwang atbồ Ƀan Tuyên giáo dà lơgar ồng Nguyễn Trọng Nghĩa sồr ală kâp ƀộ đoàn pal ngui uă ngan rlau jơh bơta ƀuơn bơh ù tiah tàm internet dê, broă tam gơl sồ nàng tơnguh jơnau git wă bơh cau kơnòm să dê bè bơhiàn kah yau, ală bơta kuơ niam chài krơi is bơh jơi bơtiàn dê kung bè gơnoar broă, bơta kuơ bơh niam chài dê gơ wèt tus mờ bơta bơtàu tơnguh dà lơgar. Mpồl duh broă Đoàn pal tơrgùm kơlôi sơnơng, bơt bơtàu ală broă lơh dong kờl ơruh pơnu sơn đờm mut lơh broă tam gơl pa, bơceh pa tàm gah niam chài; lam lơh, bơcri priă, dong kờl ală dơ̆ pơrlòng, rơndap broă sơn đờm mut lơh broă bè niam chài, ală jơnau bơceh pa, phan bơna niam chài geh bơta kuơ uă, geh bơta gơ rề dờng tàm ơruh pơnu, kơnòm pa tàu, kơnòm dềt.

Cau mblàng K’Duẩn