Jat lùp khàu bơh sơn rờp, lồi nhai 10 nam 2023, Cơldŭ lơngap lơngai tàm internet mờ Rơcang sơndră cau tìs ngui măi mok pa Kwang àng càr Dăk Lăk dờp sră yal bơh dùl nă làng bol ơm tàm xã Ea Tu, ƀòn dờng Buôn Ma Thuột mờ tơngume gơtìp dùl nă cau pơr lồm tac kơnuh tờm bơkàu lay ơn tàm mạng hơ̆ sồng sơgràm ai 10 tơlak đong.

Mờ ală broă lơh mờng chài, kwang àng neh git cau tờm lơh dơ̆ pơrlồm là Nguyễn Văn Khởi gam ơm tàm càr Sóc Trăng. Lơh broă mờ kwang bàng, bơh sơn rờp Khởi yal, lài do neh gơtìp lơh glài bè tìs “Pơrlồm sơgràm ai phan bơna”, ờ hềt geh jùt tìs. Lồi nam 2022, klau Khởi pa lik jàm mờ pơn jat tai geh jơnau kờñ pơrlồm ai priă ngui sa. Nàng lơh broă lơh tìs, Khởi lơh mat Facebook là Bơkàu ris Dà Làc, mut tàm uă mpồl tac bro sơntìl ală bơta bơkàu mờ plai chi tàm Facebook. Tŭ geh cau dan blơi, Khởi sồr pơyua lài priă dùl êt hơ̆ sồng kơryan ờ ai hòi, nhắn tin, sơgràm ai priă. Mờ kai bè do, bơh lồi nam 2022 tus tŭ do, Khởi neh pơrlồm mờr 100 nă cau tàm uă càr, ƀòn dờng tàm gùt lơgar, sơgràm ai khà priă rlau 500 tơlak đông.