VOV4.K’ho - Di pơgăp 3 nhai tai, ală kơnòm bơsram ơdŭ 12 geh mŭt tàm dơ̆ pơrlòng jơh bơsram kấp 3 nam 2022. Do là dơ̆ pơrlòng kwơ màng ngan bơh uă kơnờm bơsram dê, tài cồng nha bơh dơ̆ pơrlòng do geh uă hìu bơsram đại học ngui nàng rơwah mŭt bơsram. Tŭ do, ală hìu bơsram gam tơrgùm bơyai lơh bơto bơtơl, dong kờl bơtơl jơnau git wă ai kơnòm bơsram in nàng ală kơnòm rơsang mŭt tàm dơ̆ pơrlòng jơh bơsram kấp 3, kung bè tus bal ală dơ̆ pơrlòng is bơh ală hìu bơsram đại học bơyai lơh.

Ală ngai do, kung bè uă kơnòm bơsram ơdŭ 12 ndai sơl, oh Nguyễn Đình Dương, bơsram tàm hìu bơsram kấp 3 Phan Huy Chú, ƀòn dờng Hà Nội sùm lơh ngan lơh gơs ală jơnau bơsram tài dơ̆ bơsram tờm tàm ơdŭ mhar ngan, nàng ai tơngai bơsram bơtơl wơl jơnau git wă, rơcang ai dơ̆ pơrlòng jơh bơsram kấp 3 geh bơyai lơh tàm nhai 7 tus. Cồng nha bơh dơ̆ pơrlòng jơh bơsram kấp 3 di gơlan geh ngui nàng rơwah mŭt bơsram tàm uă hìu bơsram đại học, den tàng oh Nguyễn Đình Dương lơh ngan bơsram bơtơl wơl ndrờm ală môn nàng gơtùi geh cồng nha pơrlòng jơh bơsram kấp 3 niam ngan. Oh kung bơsram is mờ bơsram bơtơl wơl ală tơngu me ndai bơh ală dơ̆ pơrlòng is geh ờ uă hìu bơsram đại học bơyai lơh nàng tơnguh tai bơta geh tơl khà mŭt bơsram tàm ală hìu bơsram đại học: “Oh pal sền uă ngan ală broă rơwah mŭt bơsram, mờ uă kơrnoăt pơrlòng krơi is, ală môn krơi is. Mơya gơwèt mờ oh, tàm bơta kal ke den kung geh bơta ƀuơn là bol oh geh tơnguh bơta tàm pơrlòng bơh hìu bơsram dê”.

Mờ ală cau tus pơrlòng nam do, broă bơsram, bơsram wơl ai dơ̆ pơrlòng jơh bơsram kấp 3 bơh ală kơnòm bơsram sơlơ kal ke, glar bòl rơlao tŭ 3 nam bơsram kấp 3 pal lòt gan mờ tơngai bơsram ni sơna ờ hềt tŭ lơi geh, geh tŭ bơsram tàm ơdŭ, geh tŭ bơsram pờ tơlik tàm internet tài bơh kòp kovid-19. Den tàng, nàng geh sền wơl di pal bơta ngăc ngar bơh kơnòm bơsram, bơh tŭ hơ̆ geh gùng dà bơsram wơl jơnau pơrlòng di pal bơh tơl nă kơnòm bơsram dê, uă hìu bơsram neh pal bơyai lơh ală dơ̆ pơrlòng nàng sền wơl bơta niam, geh bal broă pơrlòng tơn mờ pơrlòng tàm internet. Geh ờ uă hìu bơsram đại học gam bơyai lơh dơ̆ pơrlòng is nàng rơwah kơnòm bơsram, den tàng ală hìu bơsram geh bơyai lơh bơsram wơl jơnau neh bơsram tờm ngan di jăt mờ gùng dà bơh dơ̆ pơrlòng jơh bơsram kấp 3 dê ai kơnòm bơsram in, mờ pal bơto ală tơngu me tơnguh uă nàng dong kờl kơnờm bơsram tus bal ală dơ̆ pơrlòng do in. Mò Huỳnh Thị Hoà Bình, Kwang atbồ hìu bơsram kấp 3 Lạng Giang sồ 1, càr Bắc Giang yal: “Nam do geh ờ uă hìu bơsram đại học ai geh dơ̆ pơrlòng sền wơl bơta ngăc ngar, den tàng bơdìh mờ broă bơto wơl jăt ală môn tơrgùm bal mờ ală oh neh dan cih măt, ală cau pơgru bơto geh sền tàm ală jơnau lùp, tàm bơta ngăc ngar nàng sền git bơta ngăc ngar bơh ờ uă hìu bơsram, nàng ai geh tơngu me bơsram wơl ai kơnòm bơsram in. Ală cau pơgru kung tơwèt gùng dà tai mờ kơnòm bơsram nàng kơnòm bơsram gơtùi tus bal mờ ală dơ̆ pơrlòng, geh broă rơwah geh cồng nha rơlao ai broă ală kơnòm bơsram tơnơ̆ mờ tŭ neh geh khà jơh bơsam mờ tus mờ ală hìu bơsram đại học”.

Tàm uă càr, ƀòn dờng pal bơsram tàm internet jŏ tơngai tài bơh kòp kovid-19, ală hìu bơsram pal sền wơl rơndăp broă tơngu me tờm broă bơsram tờm, tơngai bơsram wơl nàng geh broă lơh niam wơl broă bơsram wơl ai tơl mpồl kơnòm bơsram in di pal mờ bơta mùl màl. Bal mờ broă bơyai lơh sền wơl, tam cah kơnòm bơsram nàng geh rơndăp broă bơsram wơl nền nòn ai tơl mpồl kơnòm bơsram, geh ờ uă càr, ƀòn dờng kung lơh jăt broă dong kờl, bơto bơtơl cau pơgru bơto mpồl ơdŭ 12 in nàng bơto wơl kơnòm bơsram gơtùi tus bal mờ uă dơ̆ pơrlòng. Mò Bùi Thị Kim Tuyến, Kwang atbồ Sở Giáo dục mờ Đào tạo càr Hoà Bình pà git: “Bơyai lơh pơlam tàp kung bè bơtơl ai cau pơgru in bơto wơl mpồl ơdŭ 12, kung bè bơyai lơh ai ală mpồl cau pơgru tờm dong kờl bè broă lơh nàng dong kờl ai cau pơgru tàm tiah ngài in. geh ală broă ntrờn mờ ai cau pơgru ing nàng gơtùi bơh tàm tiah ƀuơn tus dong kờl ală cau pơgru tàm tiah ngài in, nàng geh ală cồng nha niam ngan”.

Gam di pơgăp 2 nhai tai, kơnòm bơsram ơdŭ 12 geh mŭt tàm dơ̆ pơrlòng jơh bơsam kấp 3. Tŭ do, Ƀộ Giáo dục mờ Đào tạo neh yal tơngu me jơnau pơrlòng lơh tơrlòng ing lài jơh bơsram kấp 3 nam 2022. Broă lơh jăt bơh ală cau pơgru tàm ală hìu bơsram geh kwơ màng ngan gơwèt mờ ală kơnòm bơsram tàm dơ̆ pơrlòng kwơ màng do.

Cau mblàng Ndong Brawl