Nam do, càr Dăl Lăk geh rlau 20 rbô nă cau pơrlòng cih mat tus bal pơrlòng tàm 32 anih pơrlòng tàm 15 kơnhoàl, thị xã, ƀòn dờng tàm càr. Nàng dơ̆ pơrlòng jơh bơsram kâp 3 nam do lơh geh cồng nha niam ngan rlau jơh, Gah bơto bơtê mờ bơsram càr Dăk Lăk gam lơh ngan rơcang ală bơta gơ rềng tus dơ̆ pơrlòng. Tàm hơ̆, tơngume bơsram wơl jơnau git wă, sền sơ wì pràn jak kơnòm bơsram dê nàng sac rơ wah bơto wơl gam geh sền gròi. Ồng Phạm Đăng Khoa, Kwang atbồ Sở Giáo zụk mờ Đào tạo càr Dăk Lăk pà git: Tus tŭ do, broă rơcang tus dơ̆ pơrlòng jơh bơsram kâp 3 nam 2023 gam geh lam lơh di mờ tơngai pơrgon. Bơdìh mờ broă kờp sền, sền sơ wì phan bơna jat jơnau sồr bơh Ƀộ Giáo zụk mờ Đào tạo dê, pơlam tàp ai kwang bàng lơh broă sền pơrlòng in. Ală hìu bơsram geh cau pơrlòng tus bal pơrlòng jơh bơsram kâp 3 gam jơh nùs bơto wơl jơnau git wă, lam lơh sền sơ wì pràn jat jat jơnau lùp pơrlòng sền git lài mờ Ƀộ Giáo zụk mờ Đào tạo ai tơlik nàng rơ wah cau pơrlòng bơto wơl jơnau git wă gơ in dipal: “Tơrgùm tàm ală oh ờ huan kơ̆ jơnau git wă nàng dong ală oh mờ ală hìu bơsram kung neh jàu kơnòl cau pơgru geh uă mờng chài in tàm broă bơto wơl jơnau git wă gơ wèt mờ ală oh do nàng ală oh geh tơl jơnau git wă mờ pin dờn tus bal dơ̆ pơrlòng do”.

Jat jơnau sồr bơh Ƀộ Giáo zụk mờ Đào tạo dê, bơh ngai 04/5, cau pơrlòng tàm gùt lơgar sơn đờm lơh sră cih mat tus bal pơrlòng jơh bơsram kâp 3 nam 2023. Tơngai lơh sră cih mat pơrlòng tus 5 jơ mho ngai 13/5 do. Cau pơrlòng gam bơsram ơdŭ 12 tàm ală hìu bơsram kâp 3, anih tờm bơto broă lơh, hìu bơsram bơ tơl sùm cih mat tus bal pơrlòng tàm internet, cau pơrlòng khat gơboh tus cih mat tơn.

Sơlơ tus rềp tơngai bơyai lơh pơrlòng jơh bơsram kâp 3 nam 2023, oh Phạm Chính Tuyến, kơnòm bơsram ơdŭ 12, hìu bơsram kâp 3 Lương Thế Vinh, ƀòn dờng Hà Nội gŏ gơ lơh kơn jơ̆ ngan, tài do geh sền là dơ̆ pơrlòng kuơmàng ngan rlau jơh lài mờ tŭ rơ wah gah bơsram broă lơh tơnơ̆ do: “Kung neh mờr tus dơ̆ pơrlòng, gam geh uă gùng nàng mut hìu bơsram đại họk. Bol oh kung kal ke ngan nàng rơ wah, gŏ gơ loh kơn jơ̆ ngan. Tàm poh den oh lời 4 ƀùi nàng bơsram tai tus trồ mang, ai ală ƀùi ờ bơsram tai den oh rơp lơh 1 jơnau lùp môn Toán, 1 jơnau lùp môn Dà Mỹ, hơ̆ sồng sền is. Ai môn Ngữ văn den dilah gam tŭ jơ oh rơp sền wơl nàng git rlau bè jơnau bơsram”.

Kơn jơ̆ tŭ pal tơrgùm jơh pràn bơsram wơl jơnau git wă rơcang tus dơ̆ pơrlòng jơh bơsram kâp 3 in là nùs nhơm bal bơh uă ngan cau pơrlòng dê tàm tŭ mìng gam rlau 1 nhai tai rơp geh lơh dơ̆ pơrlòng. Do là tơngai dut ndơl nàng ală poh bơsram wơl jơh jơnau git wă bơh ală môn dê tàm dơ̆ pơrlòng. Bè đah ală hìu bơsram, nàng broă bơsram wơl jơnau git wă ală kơnòm bơsram in geh cồng nha rlau, bal mờ broă tơrgùm wơl ală tơngume jơnau bơsram, bơto wơl jơnau git wă tờm ai kơnòm bơsram in, cau pơgru gam ai kơnòm bơsram lơh ală bơta jơnau lùp ai tơlik lài. Pơgru Vũ Thị Minh Trang, pơgru bơto môn Ngữ Văn, Hìu bơsram phổ thông liên kâp Alfred Nobel pà git: “Bơdìh mờ ală tŭ jơ bơsram tàm ơdŭ den ală oh gam geh tŭ jơ bơsram tai mờ kung tryăng ngan tàp lơh ală jơnau lùp mờ pơgru jàu mờ pơgồp bal mờ ală pơgru tàm ală tŭ jơ bơsram tàm ơdŭ”.

Bulah tàm tơngai bơsram wơl jơnau git wă dut ndơl, mơya ală pơgru mờ cau jak chài ndrờm tơngkah kơnòm bơsram pal gàr niam nùs nhơm, gàr niam pràn kơldang să jan, rơcang bơsram wơl jơnau git wă, bơta chài lơh tơl môn pơrlòng. Tiến sỹ Huỳnh Văn Chương, Kwang atbồ Kụk atbồ bơta niam, Ƀộ Giáo zụk mờ Đào tạo tơngkah: “Tŭ do den ală oh tàm tơrgùm tàm broă bơsram wơl jơnau git wă den đah Ƀộ mờ ngan là Kụk atbồ bơta niam bol hi tơngkah ală oh là kơ̆ nùs, pin dờn mờ bơsram wơl jơnau git wă nền nòn jat tơngume bơsram, lơh jat ală bơta jơnau lùp pơrlòng bơh uă nam dê, kuơmàng là jơnau pơlam mờ bol hi pa yal bơh nam 2023 dê. Ală oh pơn đơl pràn kơlôi sơnơng nền nòn jơnau lùp pơrlòng, nàng ờ mìng sền sơ wì jơh bơsram kâp 3 mơya kung là dipal tàm broă sền sơ wì mut hìu bơsram đại họk mờ ală bơta ndai”.

Ƀộ Giáo zụk mờ Đào tạo pà git, neh rơcang jơh ală bơta phần mềm, phan bơna, măi mok, kông nghệ yal tơnggit jơnau ai broă lơh sră cih mat tus bal pơrlòng in. Ƀộ Giáo zụk mờ Đào tạo kung geh mpồl lơh broă sùm ngai mang nàng dong bơsong ală broă gơlik geh dilah geh. Dơ̆ pơrlòng jơh bơsram kâp 3 nam 2023 rơp geh lơh bơh ngai 27 tus ngai 30/6 tus. Điểm pơrlòng kờp dŭ geh yal tàm ngai 18/7 tus.