VOV4.K’ho- Bơh ngai 04 tus ngai 13/05 nam 2022, kơnòm bơsram ơdŭ 12 tàm jơh gùt lơgar tus bal pơrlòng jơh bơsram kâp pe nam 2022 tàm ală anih ătbồ pơrlòng bơh Ƀô Giáo zụk mờ Đào tạo dê. Bơta pa là ala tài lơh sră cih mat tàm sră pơ àr, den nam 2022 do, dơ̆ sơnrờp, kơnòm pơrlòng cih mat tus bal pơrlòng geh lơh tàm internet, mìng is kơnòm pơrlòng khăt gơboh is geh kung gam lơh sơl lơh sră cih mat tus bal pơrlòng geh lơh tơn tàm sră pơ àr tàm anih bơh Sở Giáo zụk mờ Đào tạo dê ai. Bulah là nam sơnrờp lam lơh cih mat dan tus bal pơrlòng geh lơh tàm internet, mơya broă cih mat bơh kơnòm pơrlòng dê geh lơh ƀươn ngan, gơmù bơta tìs hŭi mờ tơn rŭc lơyah geh tŭ tơngai pơndrờm mờ cih mat mờ sră bè ală nam lài.

Ală kơnòm bơsram ơdŭ 12 cih mat pơrlòng geh lơh tàm internet tàm ală anih ătbồ pơrlòng bơh ngai 04 tus ngai 13/05 nam 2022 tàm hìu bơsram kâp pe. Nàng ală kơnòm pơrlòng lơh kwèng, Ƀộ Giáo zụk mờ Đào tạo pờ ală anih ătbồ pơrlòng nàng kơnòm bơsram in cih mat tus bal lòng pơrlòng lài. Mat là sồ kăn kươk làng bol halà sră kim ta làng bol bơh kơnòm bơsram dê. Dilah ờ geh sră kăn kươk làng bol halà sră kim ta làng bol den ngui mã sồ măt sơnđan geh anih lơh broă kwang àng ai nàng ala. Bơh tơnơ̆ tŭ Ƀộ Giáo zụk mờ Đào tạo pờ ală anih ătbồ pơrlòng tơn, oh Nguyễn Xuân Mạnh, kơnòm bơsram ơdŭ 12, Hìu bơsram Kâp pe Phúc Lợi, ƀòn dờng Hà Nội neh pờ sền tàm pang web nàng cih mat tus bal pơrlòng jơh bơsram kâp pe nam 2022. Neh geh dùl poh lài hơ̆ nàng lòng cih mat lài, den tàng Mạnh mìng roh bàr pe phuk lơm nàng lơh sir jơh sră cih mat bơh he dê mờ 16 broă tờm, mhar rlau uă pơndrờm mờ sră nggal lơh mờ pơ àr. Oh Nguyễn Xuân Mạnh, đơs: Ngai cih mat lòng tơrlòng lài den oh kung geh lòng cih mat lài sơl mờ geh pơgru bơto pơlam mờ ngai cih mat ngan ngồn den oh gŏ kung ờ geh tìp uă kal ke lơi ờ.

Bơdìh mờ tơn rŭc lơyah tŭ jiơ uă rlau pơndrờm mờ sră nggal lơh mờ pơ àr, cih mat pơrlòng jơh bơsram kâp pe lơh tàm internet gam dong kơnòm pơrlòng gĭt geh kung bè lơh tam gơl geh jơnau yal tơngĭt bơh he dê mhar, dipal tàm ală tŭ cih mat. Dùl nă kơnòm bơsram ndai tàm Hà Nội, pà gĭt: Broă online bè tŭ do den broă kờp sền wơl jơnau yal tơngĭt kung ƀươn rlau tŭ mờ geh bơnah yal tơngĭt jơnau mờ bol oh ờ gŏ gĭt den gơ mpờl lài tàm hơ̆, bol oh mìng lơh broă pờ mŭt dùl ƀă ƀươn soh rlau.

 Tàm ală ngai sơnrờp cih mat tus bal pơrlòng jơh bơsram kâp pe, khà kơnòm bơsram cih mat ờ hềt uă, mơya ală hìu bơsram kung gam ai cau pơgru drơng broă lơh bơto pơlam yal tàm sră nggal ai kơnòm bơsram in. Ală pơgru ătbồ ơdŭ kung bơto yal ai kơnòm bơsram in broă yal tàm sră nggal mờ ală bơta tam gơl mờ kơnòm pơrlòng pal kah. Nàng lơh geh bơta ƀươn ai kơnòm pơrlòng in, ală hìu bơsram ndrờm rơcăng lài cơldŭ măy tíñ geh tơrbŏ internet sùm mờ jàu pơgru bơto kông nghệ thông tin in rơcăng lài dong kờl ală oh. Mò Huỳnh Thị Hoà Bình, Kwang ătbồ Hìu bơsram Kâp pe Lạng Giang sồ 1, càr Bắc Giang pà gĭt: Gơwèt mờ broă kơnòm bơsram cih mat is tàm internet den tŭ lơi ală oh kung ngui tơn ală điện thoại ală oh dê, halà ală măy tíñ bơh ală oh dê tàm hìu, broă do gơ là ƀươn ngan ai kơnòm bơsram in. Mơya, tàm ală tŭ lam lơh mờ kơnòm bơsram, den hìu bơsram gŏ là ală oh sùm geh ală broă, pơnyơu bè ală oh hơ̆ pa mŭt tàm măt, ala măt pờ, mơya tơnơ̆ hơ̆ tơn den ală oh hơ̆ hŭi tơn măt pờ bơh să tờm he dê. Hìu bơsram ai kwang bàng dong kờl, hơ̆ sồng mpồl cau pơgru ătbồ ơdŭ 12 tŭ lơi kung rơcăng nàng dong kờl ală oh.

Bal mờ ală bơta ƀươn, den ală tŭ cih mat dan tus bal pơrlòng jơh bơsram kâp pe lơh tàm internet kung gơtìp bàr pe bơta ờ hềt niam sơl, bè gùng jun internet ờ pràn lơh bàr pe nă kơnòm pơrlòng gơ tơlik bơdìh pang web tàm ală tŭ cih tàm sră nggal. Bal mờ hơ̆, broă cih mã sồ sơnah ƀòn, xã bè lơi, môn ai lài bè lơi kung lơh uă kơnòm bơsram kwi kwơ, pal kơnờm mờ pơgru dong kờl. Ùr pơgru Bùi Thị Hồng Duyên, bơto tàm Hìu bơsram Ală kâp Việt- Úc, Hà Nội yal: Digơlan tìp kal ke bè gùng jun internet. Dơ̆ bàr là tàm ală tŭ cih mat lơh tàm internet den bàr pe broă gam tìp kal ke hơ̆ là bơnah cih mat sơnah ƀòn, xã ờ geh tàm ală anih cih mat lơh is kal ke. Dơ̆ pe là bàr pe broă gam kơlôi rơcăng bè broă ală kòn geh pal pơrlòng môn dà đơs lơgar ndai halà ờ.

Ồng Phạm Quốc Khánh, Phó Kwang ătbồ Kụk Ătbồ bơta niam, Ƀộ Giáo zụk mờ Đào tạo pà gĭt, do là dơ̆ sơnrờp lam lơh ai kơnòm bơsram ơdŭ 12 in cih mat tus bal pơrlòng geh lơh tàm internet, den tàng Ƀộ neh lơh tơrlòng lài cih mat tàm internet tàm 2 hìu bơsram kâp pe tiah kal ke bơh càr Bắc Giang mờ Hoà Bình dê mờ cồng nha ală kơnòm bơsram lơh cih mat tàm internet ƀươn ngan. Ồng Phạm Quốc Khánh, yal: Tàm 2 hìu bơsram kâp pe tàm ù tiah kal ke bơh jơh bal 2 tiah do dê, cồng nha bơh sơnrờp ală kơnòm bơsram ndrờm chờ hờp ngan mờ ndrờm ƀươn ngan lơh. Să tờm tơn sền ală oh lơh den gơtùi gŏ là, ală oh chờ hờp ngan mờ tàm tŭ lơh den lơh tàm tŭ jiơ dùl êt ngan, pe phuk là neh lơh sir jơh tơn, jơnau là tài bơh phần mềm kung ngac ngar ngan sơl mờ tàm hơ̆ neh ngui geh dùl tàm ală tă pơgồp kwơmàng ngan bơh ală pơgru dê tàm broă lơh sồr lơh, hơ̆ là kờp sền mờ lơh sir ală jơnau yal tơngĭt gah bơto bơtê mờ 2 hìu bơsram tàm tiah kal ke uă ngan bơh 2 càr hơ̆ den den 100% ală oh ndrờm neh geh mã sơnđan măt.

Gơwèt mờ ală kơnòm pơrlòng khăt gơboh is, tơnơ̆ tŭ pơyua sră cih mat dan tus bal pơrlòng jơh bơsram kâp pe geh lơh tơn tàm anih bơh Sở Giáo zụk mờ Đào tạo dê ai, kơnòm pơrlòng geh anih cih mat tus bal pơrlòng pà măt hơ̆ là sồ kăn kươk làng bol halà sồ sră kim ta làng bol bơh kơnòm pơrlòng dê mờ măt pờ nàng pờ mŭt tàm ală anih ătbồ pơrlòng.

Ƀộ Giáo zụk mờ Đào tạo tơngkah, kơnòm bơsram pal gàr ndơ̆p jơnau yal tơngĭt măt mờ măt pờ. Dilah tàm tŭ gơtìp hŭi măt mờ măt pờ, kơnòm bơsram lòt lùp mờ hìu bơsram, là tiah cih mat dan tus bal pơrlòng nàng geh pà wơl.

            Cau cih VOV1- Cau mblàng Lơ Mu K’Yến