Tàm ƀùi drim, kơnòm pơrlòng lơh jơnau pơrlòng môn Ngữ văn jat broă lơh cih jơnau, tŭ jơ lơh jơnau pơrlòng là 120 phuk. Ƀùi mho, kơnòm pơrlòng lơh jơnau pơrlòng môn Toán jat broă lơh trắk nghiệm, tŭ jơ lơh jơnau pơrlòng là 90 phuk. Ngữ văn là môn pơrlòng cih jơnau mìng dùl lơm tàm khà ală môn pơrlòng jơh bơsram kâp pe nam 2024 mờ là môn geh sền bè “vĕ” nàng dong ală kơnòm pơrlòng geh tŭ niam tơnguh điểm he dê.

Jat Ƀộ Giáo zụk mờ Đào tạo pà git, jơnau lùp pơrlòng môn Ngữ văn dơ̆ pơrlòng jơh bơsram kâp pe nam 2024 rơp ờ geh bơta tam gơl lơi uă pơndrờm mờ ală nam lài mờ uă ngan gơ ơm tàm jơnau bơsram ơdŭ 12. Thứ trưởng Ƀộ Giáo zụk mờ Đào tạo ồng Phạm Ngọc Thưởng kơp kờñ ală kơnòm pơrlòng gàr pràn kơldang să jan, pin dờn mut tàm dơ̆ pơrlòng, lơh jơnau pơrlòng di mờ ală jơnau geh bơsram, jat jơnau pơlam bơh pơgru dê mờ lơh jat di jơnau pal jat bơh dơ̆ pơrlòng dê nàng geh điểm bè bơta kơp kờñ.