VOV4.K’ho- Tàm ală ngai do, tàm ƀòn dờng Hồ Chí Minh neh geh lơh Pơrlòng pờ tơlik jơnau đơs gùt lơgar dơ̆ XV nam 2022. Mờ tơngume “Rơcăng lài tam gơl- gơdờp bal sơrlèt gan”, Pơrlòng pờ tơlik jơnau đơs gùt lơgar dơ̆ do geh khà mpồl tus bal gal ngan rlau jơh (86 mpồl) mờ khà jơnau cih pơyua pơrlòng geh uă ngan rlau jơh bơh lài tus tŭ do, mờ rlau 500 jơnau cih. Do ngan ngồn là “ngai chờ” bơta chài, bồ tơngoh jak lơh broă ờs mờng dờng bơh ală cau lơh broă pờ tơlik jơnau đơs dê, geh bơta pràn lơh gơrề pràn kơldang tàm làng bol.

Pơrlòng pờ tơlik jơnau đơs gùt lơgar geh bơyai lơh ờs mờng 2 nam dùl dơ̆ nàng kờñ sền gŏ, jờng rơ ală cau cih, jơnau cih jak ngan bơh ală cau lơh ƀăo, cau pờ tơlik jơnau đơs tàm gùt lơgar dê. Pơrlòng pờ tơlik jơnau đơs gùt lơgar dơ̆ XV nam 2022 geh tơngume là “Rơcăng lài tam gơl- gơdờp bal sơrlèt gan”. Bơh rlau 500 jơnau cih pơyua pơrlòng (uă ngan rlau jơh bơh lài tus tŭ do), Mpồl bơyai lơh neh rwah geh 203 jơnau cih mŭt tàm dar pơrlòng dŭt ndơl tàm ală bơta jơnau cih: sền gŏ ngan ngồn, lùp, jơnau lơh lèu, pờ tơlik jơnau đơs tơn...Bơta pa bơh Pơrlòng dơ̆ do dê là Mpồl bơyai lơh kung bơyai lơh pơrlòng mờ jàu khà jờng Săp đơs niam, jàu khà jờng jơnau cih bơta chài rơndăp lơh jak ngan mờ jơnau cih ngui bơnàng jă sồ...

Do là dơ̆ bàr Pơrlòng geh bơyai lơh tàm ƀòn dờng Hồ Chí Minh mờ là ngai chờ bơh ală cau lơh ƀăo pờ tơlik jơnau đơs tàm gùt lơgar dê. Ồng Phan Văn Mãi, Củ tịc Ủy ƀan Ñân zân ƀòn dờng Hồ Chí Minh đơs là, Pơrlòng ờ mìng là broă lơh ờs mờng ală bơta chài bơta jak lơh broă ờs mờng geh bơngă pin dờn uă mờ gam là nùs nhơm bơh ală cau lơh ƀăo pờ tơlik jơnau đơs dê gơwèt mờ ƀòn dờng Hồ Chí Minh, tiah mờ rlau dùl nam lài neh rơkồn să he tềng đăp bơta kòp dờng Kovid-19 ờ hềt tŭ lơi geh bơh lài tàm jơnau kah yau. Ồng Phan Văn Mãi, đơs: Ală cau lơh ƀăo bal mờ mpồl lơh broă tàm tiah lam lài, làng bol tàm gùt lơgarmờ gơ̆p bơyô dunia neh tus mờ tiah bơtờp uă kòp ngan rlau jơh tàm tơngai kal ke bòl glar ngan rlau jơh. Mờ kơnờm bơta geh mat hơ̆, jơh gùt lơgar gĭt geh, wă wờng geh, tam pà rlau, lòt bal uă rlau mờ ƀòn dờng. Ƀòn dờng geh pơndờm pơnđiang, lơh ngan rlau tai nàng sơrlèt gan tŭ tơngai kal ke ngan rlau jơh. Mờ tàm bơta hơ̆, bol he neh gŏ geh bơta kwơmàng bơh pờ tơlik jơnau đơs dê tŭ neh lơh jăt niam gơnoar broă bơh he dê.

Kwang ătbồ dờng VOV ồng Đỗ Tiến Sỹ jañ sơngơr sơnđờm mŭt lơh Pơrlòng pờ tơlik jơnau đơs gùt lơgar

Pơrlòng pờ tơlik jơnau đơs gùt lơgar dơ̆ XV tàm ƀòn dờng Hồ Chí Minh ngan ngồn là “ngai chờ” ală bơta chài, bơta jak tàm broă lơh ờs mờng dờng bơh ală cau lơh broă pờ tơlik jơnau đơs dê, geh bơta pràn lơh gơrề pràn kơldang tàm làng bol. Tàm hơ̆, Jơnau đơs Pờ tơlik neh gơhòi gơ jà geh bơta sền gròi bơh cau iăt, cau sền dê mờ jơh bal ală oh mi lơh broă do. Bal mờ ală tơngume jơnau gơlik pah ngai duh hồl geh mpồl bơtiàn sền gròi den ală cau năc jà bơh mpồl tus bal pơrlòng dê kung cèng tus nùs nhơm dơ̆ pơrlòng in uă bơta ngoh rơngăc. Hơ̆ là ală jơnau yal dong kờl rềs àr tàm dơ̆ trồ tiah lơh aniai, dà tih dà cò, ồs sa. Jơnau yal “ờ tŭ lơi dơrcul nùs” bơh Hoàng Thị Mũ dê mờ nùs nhơm kòn bơnus tàm jơm tàm ròng bal ram mhŭ niam bơnĕ ngan bơh ală ùr pơgru tiah kơh bơnơm dê, jơnau yal bè bơta geh ngan bơh mpồl rơcăng sơndră mờ crùh ồs sa dê neh lơh kah wơl uă ngan tus mờ jơh ală cau iăt, cau sền. Ờ cau lơi sền cau lơi, ală dà mat hòr ngoh rơngăc ñìm. Bi Nguyễn Huy Hoàng, cau lơh ƀăo Gah Gùng lòt ƀòn dờng Hồ Chí Minh, yal: Bơh pơrlòng pờ tơlik jơnau đơs, ală jơnau yal bè Thiếu tá Thành, bơh oh Mũ dê lơh să tờm añ geh bơta sền gŏ ờ mìng bè broă lơh ờs mờng mờ gam bè nùs nhơm kòn bơnus, gơn kơnờm do là ală bơta pràn niam ngan lơh gơrề uă rlau, kung là dùl bơta gơn kơnờm lơh gơrề uă rlau nàng ală cau lơh ƀăo bè bol añ in nàng yal wơl ală jơnau yal niam ai cau iăt in.

Ồng Nguyễn Trọng Nghĩa, Ƀí thư Đảng Dà lơgar, Kwang ătbô Ƀan Tuyên giáo dà lơgar dê đơs là, pơrlòng bơyai lơh tàm tŭ jơh gùt Đảng, gùt làng bol mờ jơh gùt ling klàng gam ai jơh pràn tàm pơrlòng, jơh nùs lơh ngan lơh jăt tus geh Kơrnoăt Pơrjum dờng cau ala măt gùt lơgar khoă XIII bơh Đảng dê; dùl nùs bal, tơrgùm bal pràn lơh jăt ală gùng dà, broă lơh bơh Đảng, Dà lơgar dê nàng kờñ bơtàu tơnguh wơl mờ bơtàu tơnguh lơh sa- mpồl bơtiàn tơnơ̆ tơngai gơbàn kòp dờng Kovid-19. Tàm rài tam gơl bơta yau gơ gơs bơta pa 4.0, bal mờ bơta bơtàu tơnguh bơh ală gah sră ƀăo ờs mờng bơh lài dê, bơta sră ƀăo pa bè ƀăo điện tử, mờ internet mpồl bơtiàn tơlik mat mờ bơtàu tơnguh pràn kơldang, lơh gơlik gơs bơta tàm pơrlòng pràn ngan mờ ală bơta sră ƀăo ờs mờng bơh lài. Den tàng bè hơ̆, Anih Jơnau đơs Việt Nam mờ gah pờ tơlik jơnau đơs Việt Nam kờñ pal sùm tam gơl pa bồ tơngoh kơlôi sơnơng, jòi sơnơng, jòi broă lơh pa nàng rơcăng lài tam gơl, gơdờp bal mờ broă lơh ƀău tàm tơngai pa. Pờ tơlik jơnau đơs Việt Nam kờñ pal gơ gơs là gah tă pơgồp wơl jơnau đơs bơh mpồl bơtiàn dê bal mờ jơnau kờñ lơh gùng dà broă lơh dipal, geh bơta pràn kis tàm rài kis ngan ngồn, pơgồp bơnah tàm broă gàr kơ̆ kơl jăp cíñ trị mpồl bơtiàn mờ bơtàu tơnguh dà lơgar, rề ơnàng làng bol lơh tờm, tơnguh uă bơta pràn jak đơng lam bơh Đảng dê, ătbồ bơh Dà lơgar dê gơwèt mờ mpồl bơtiàn. Ồng Nguyễn Trọng Nghĩa, đơs sùm: Tơl nă cau lơh ƀăo pờ tơlik jơnau đơs kờñ pal lơh jăt niam rlau tai nùs nhơm bơsram is, tàp is, tơnguh uă nùs nhơm kơ̆ dơn cíñ trị, nùs nhơm gah broă lơh; jòi lùp bơsram is bơta gĭt wă, broă lơh ờs mờng bơta chài bơta jak tàm broă lơh ƀăo, geh bồ tơngoh kơlôi sơnơng is, bồ tơngoh kơlôi sơnơng tă pơgồp jơnau đơs tềng đăp tơl broă. Tơl nă cau lơh ƀăo kờñ pal lòt, lòt rềp mờ bơta geh ngan tàm rài kis, yal wơl loh làng nhơm tă rài kis dê, tơmŭt bal să he mờ làng bol, kis tàm nùs nhơm làng bol, bè hơ̆ den hơ̆ sồng gơtùi cih geh ală jơnau cih geh bơta kwơ uă, bềng nùs nhơm pơlam gùng bồ tơngoh, nùs nhơm bơto tơngkah kòn bơnus, bơta geh ngan mờ tài bơh kwơ dà lơgar, jơi bơtiàn dê.

Ƀí thư Thàñ ủy Hồ Chí Minh ồng Nguyễn Văn Nên mờ Kwang ătbồ dờng VOV ồng Đỗ Tiến Sỹ jàu bơkàu ai ală cau ai điềm dơ̆ pơrlòng in

Ală ngai geh lơh Pơrlòng pờ tơlik jơnau đơs gùt lơgar dơ̆ XV tàm ƀòn dờng Hồ Chí Minh bal mờ ală broă lơh ală bơta chài bơta jak tàm broă lơh ờs mờng duh hồl, gam geh ală dơ̆ cribơyai ai ală cau lơh broă pờ tơlik jơnau đơs Việt Nam in tìp măt, lơh kwèng mờ tam pà bal bơta mờng chài. Hơ̆ là ală broă lơh bè Ràng tơlik “Cồng nha bơtàu tơnguh bơh ƀòn dờng Hồ Chí Minh dê”, cribơyai dunia “Bơtàu priă lơh geh ai ală Anih Pờ tơlik jơnau đơs mờ sơñio rùp in tàm tơngai tam gơl sồ”, cribơyai bơta chài “Bơta lòng bơh pờ tơlik jơnau đơs dê tàm tŭ tơngai tam gơl sồ”, cribơyai “Lơh gơlik jơnau đơs pờ tơlik jơnau đơs lơh rài bồ tơngoh tàm tŭ geh uă broă lơh rài bồ tơngoh pờ tơn tàm internet”. Hơ̆ ngan ngồn là “ngai chờ” ală bơta chài bơta jak lơh broă ờs mờng dờng bơh ală cau lơh broă pờ tơlik jơnau đơs dê, tơngŏ geh tơngume “Rơcăng lài tam gơl- gơdờp bal sơrlèt gan”.

Cau cih VOV- Cau mblàng Lơ Mu K’Yến