Bồ nhai 3, tàm xã Đông, kơnhoàl Kbang, càr Gia Lai gơtìp dùl dơ̆ ồs sa tŭ chu suơn tào neh sreh lơh gơtìp ồs sa rề 5 lồ ù tàm ală suơn tam tào ờ hềt sreh. Ồng Nguyễn Đăng Chung, Củ tịc UɃÑZ xã Đông pà git, tơnơ̆ mờ tŭ gơtìp bơta do, gơnoar atbồ xã neh hòi jà hìu măi sơdàng An Khê ai lài broă blơi khà tào gơtìp ồs sa làng bol in, kơnờm mờ hơ̆, hơ̆ sồng geh gơmù hoàc huơr. Gơtìp ồs sa tào geh sền gŏ, tơnơ̆ mờ tŭ neh jơh sreh suơn tào hìu nhă dê, ồng Hồ Văn Vĩnh kis tàm thôn 2, xã Đông, lơh gùng kơrian ồs hơ̆ sồng chu nàng lơh kloh suơn tam tào hìu nhă dê. Mơya, tàm tŭ chu suơn tam tào, ồng Vĩnh ờ sền gròi den tàng neh lời ồs sa rề tus tàm suơn tào rềp bal bơh hìu ồng Đinh Tấn Đức mờ Nguyễn Ngọc Công dê, lơh mờr 5 lồ tào bơh bàr hìu nhă do gơtìp ồs sa.

Tềng đăp mờ bơta do, ală ngai do làng bol lơh broă sa gam lơh ngan sreh tào. Ồng Trần Văn Tuấn, kis tàm xã Nghĩa An, kơnhoàl Kbang, càr Gia Lai pà git: Tào nam do hòn gơs niam, tăc geh priă, mơya làng bol kơlôi rơcang tài ngòt gơtìp ồs sa tào tài gam tàm kàl prang trồ tơngai duh. Ồng Trần Văn Tuấn đơs: “Hìu làng bol bol añ den tŭ do gam di pơgăp 3 rơbô 200 tấn tào tai. Tàm tŭ trồ prang tơngai duh den ală tiah lơi prang uă pal geh rơwah lài, tào ro nha là sreh lài, gam ală tiah lơi gam tơlir nha, ờ hoan gơtìp ồs sa den lời sreh tơnơ̆”.

Ngai 06 nhai 03 lài do, làng bol kis tàm ƀòn Kruối Chai, xã Yang Bắc, kơnhoàl Đăk Pơ, càr Gia Lai gŏ suơn tam tào tàm ƀòn gơtìp ồs sa den tàng neh hòi jà ală cau tus bal pù ồs. Mờ yal gơnoar atbồ xã bal mờ mpồl ling gàr ƀòn tàm xã nàng ai cau ling tus pù ồ, bañ lời ồs sa rề tus tàm ală bă suơn tam tào rềp bal. Mơya, tài trồ tiah prang duh, phan pù ồs ờ geh, mìng geh phan bè ờs den tàng ồs neh sa 4 lồ 5 sào tào gam tàm tơngai rơcang sreh tơnhào. Do là bă suơn tam tào bơh 3 hìu làng bol kis tàm thôn An Quý, xã Phú An, kơnhoàl Đăk Pơ dê. Jăt jơnau sền sơnrờp ngan, geh uă bơta lơh gơtìp ồs sa tào là tài làng bol chu ñhơ̆t lơh gơtìp ồs sa rề. Lài mờ hơ̆, tàm bồ nhai 3, tàm ƀòn Kruối Chai kung neh gơtìp dùl dơ̆ ồs sa tào lơh hoàc huơr 2 lồ 8 sào tào neh mờr tus tơngai sreh tơnhào bơh làng bol dê. UɃÑZ xã Yang Bắc neh lơh broă mờ hìu măi sơdàng An Khê nàng mhar sreh tơnhào bă ù tam tào gơtìp ồs sa nàng tơmù hoàc huơr ai làng bol in.

Mờr 1 nhai do, tàm ală tiah hờ đah măt tơngai lik càr Gia Lai pơn jăt sùm gơtìp ồs sa tào. Neh geh mờr 20 lồ tào gơtìp ồs sa tàm ală kơnhoàl Kông Chro, Đăk Pơ, Kbang mờ thị xã An Khê. Ồng Trần Văn Đấu, Phó kwang atbồ phòng Nông nghiệp mờ Phát triển Nông thôn kơnhoàl Kông Chro yal, kàl tam tào nam do, kơnhoàl geh mờr 10 rơbô lồ ù tam tào. Tŭ do, neh geh rơlao nggùl bă ù neh geh sreh tơnhào. Trồ tiah prang duh neh lơh ală bă ù tam tào gam tai gam tàm bơta gơtìp ồs sa uă ngan. Ồng Trần Văn Đấu pà git: “Mblàng yal làng bol in tơnguh uă jơnau git wă tàm broă rơcang sơndră mờ ồs sa tào, bañ cèng phan ƀuơn gơtìp ồs sa mŭt tàm tsuơn tam tào. Bơdìh hơ̆ tai, lơh jăt ală broă lơh bè lơh gùng kơrian ồs, bañ lời ồs sa rề bơh suơn do tus suơn ndai”.

Tiah tam tào hờ đah măt tơngai lik càr Gia Lai kờp jơh bă ù ơnàng 30 rơbô lồ. Tus tŭ do, làng bol lơh broă sa neh tơnhào di pơgăp 65% bă ù tam tào tàm gùt tiah mờ kờp dŭ geh sreh tơnhào jơh tàm lồi nhai 4 tus. Ồng Nguyễn Hoàng Phước, Phó Kwang atbồ Hìu măi Sơdàng An Khê pà git, hìu măi neh bơyai lơh uă dơ̆ pơrjum mờ ală tiah, hìu cau tam tào nàng cri bơyai mờ lơh jăt ală broă rơcang sơndră mờ ồs sa tào tàm tơngai kàl prang trồ tơngai duh. Ồng Nguyễn Hoàng Phước đơs: “Tŭ gơtìp bă ù tam tào ồs sa den hìu măi bal mờ gơnoar atbồ xã, làng bol lơh broă sa tơrgùm sreh tơnhào tào mhar nàng pơn diang tào tus hìu măi tàm tơngai gờñ ngan. Ờ kờñ gơtìp bơta do, mơya tŭ rềs àr den bol añ blơi tào mờ priă gơmù rơlao pơn drờm mờ tào bè ờs là 100 rơbô đong tàm 1 tấn. Kung ai geh bơta niam dong kờl làng bol, priă geh bơh làng bol tam tào tàm bă ù tam tào gơtìp ồs sa kung gam geh bơh 25 tus 30 tơlăk đong tàm 1 tấn mờ cồng nha geh 78 tấn tàm 1 lồ”.

Nam lài, tàm càr Gia Lai neh gơtìp mờr 100 dơ̆ ồs sa tào mờ ubă ù gơtìp hòc huơr rơlao 300 lồ, lơh hoàc huơr uă ngan bè priă geh bơh rơlao 200 hìu làng bol dê. Den tàng, Sở Nông nghiệp mờ Phát triển Nông thôn càr Gia Lai dan mờ UɃÑZ càr Gia Lai đơng lam Kwang àng càr tơnguh broă mblàng yal tàm broă rơcang sơndră mờ ồs sa tào tàm càr; lùp khào, nàng git tài bè lơi gơtìp ală dơ̆ ồs sa tào, lơh glài nền nòn ală cau lơi kờñ lơh aniai.