Ală jơnau đơs mờ jơnau cih tă pơgồp jơnau đơs geh sền tàm dơ̆ crbơyai tơrgùm lơh loh cồng nha lơh geh mờ ală broă gơ tơlik tus bơh 10 nam lam lơh jăt Kơrnoăt Dà lơgar 08, khoă XI bè Broă rơndăp lơh sền gàr Dà lơgar tàm bơta pa tàm ù tiah Quân khu 7 dê. Trung tướng ồng Trần Hoài Trung, Ƀí thư Đảng ủy, Cíñ ủy Quân khu pà gĭt, Quân khu 7 geh ù tiah kwơmàng, ù tiah tờm bơh tiah đah jum dà lơgar mờ jơh gùt lơgar dê. Đảng ủy, Gah đơng lam Quân khu 7 gĭt nền geh 3 bơta rơcăng: Rơcăng bơ̆t bơtàu broă sền gàr dà lơgar tàm jơh gùt làng bol, tiah rơcăng gàr lài; rơcăng ai làng bol mờ rơcăng dong kờl lơgar gơ̆p bơyô Campuchia in. Quân khu 7 neh lam lơh geh cồng nha broă lơh sền gàr tiah nhàr lơgar dà lơgar dê bal mờ uă broă lơh bơceh pa, geh cồng nha. Ală kwang bàng neh dan mờ Dà lơgar kơlôi sơnơng, geh kơrnoăt pa bè broă rơndăp lơh sền gàr Dà lơgar nàng lơh geh jơnau sồr, kơnòl broă sền gàr Dà lơgar tàm bơta pa.