Broă geh mpồl bơtiàn sền gròi là tàm jơnau rcang cih adat dơ̆ do bơtơl pềs geh bơta lơh chơ̆t jê uă tàm mpồl phan tam lơh brah brài. Jat Ƀộ Kwang àng, tơngai pa do, broă ngui adat boh lam ai ngui phàu mòn is, phan tam lơh brah brài nàng pơhìn mờ lơh gơlik  dơ̆ tìs gơbàn geh kal ke ngan.

Tàm 5 nam do, neh sền gŏ mờr 17 rơbô dơ̆, kŭp rlau 26 rơbô nă cau ngui pềs geh bơta lơh chơ̆t jê uă nàng lơh gơlik tìs mờ bơta khin bơr nañ, jàñ bơsak, lơh ờ suk ơm ngan tàm mpồl bơtiàn. Ngan ngồn lùp khàu ală dơ̆ lơh tìs pà gŏ, mìng bơsong lơh glài kŭp jàm tơnơ̆ tŭ geh tơl cơng tàng đơs pơndŭt cau lơh tìs bal mờ ală tìs ndai, mờ ờ gơtùi bơsong geh cau prăp pồn tìs mờ kơrnoat boh lam phan tam lơh, tài bơh tàm adat geh ngui tŭ do ờ cih pềs là phan tam lơh. Jơnau rcang cih adat gam yal mờ Quôk hội in cribơyai, mìng cih tŭ pềs geh bơta lơh chơ̆t jề uă là phan tam lơh tŭ cau ngui tàm jơnau kờñ lơh tìs mờ adat boh lam. Tŭ cau ngui pềs tàm jơnau kờñ lơh broă, lơh sa, ngui tàm rài kis pah ngai rơ̆p ờ gơwèt ơm tàm bơta tam gơl wơl bơh adat do dê.