Jăt bơta jàu gơnoar bơh Thủ tướng Cíñ phủ sền pang sră yal, Ƀộ trưởng Ƀộ Kế hoạc mờ Đầu tư ồng Nguyễn Chí Dũng pà git, broă lơh bơtơl ờ uă gùng dà broă lơh krơi is nàng gơtùi lơh gơs adăt boh lam Jơnau lơh nền tàm pơrjum sồ 39 bơh Ƀộ Cíñ trị dê, nàng ngui ală bơta geh, bơta kwơ nàng bơtàu tơnguh càr Nghệ An mhar mờ kơl jăp, là tiah tờm bơh tiah Đah tô tàm gùl lơgar dê bè kă bro phan, logistics, lơh sơnơm, bơto bơtê mờ bơsram, khoa họk mờ kông nghệ, lơh sa mờ măi mok mờ lơh sa mờ suơn sre ngui bơta chài măi mok pa.

Tơnguh broă tam pà kấp, tam pà gơnoar, tơnguh broă lơh tờm, tơnguh kơnòl bơh gơnoar atbồ càr Nghệ An dê, mờ gàr niam kơnòl sền swì, jăt sền bơh Quốk hội, Cíñ phủ, HĐÑZ ală kấp tàm càr Nghệ An. Jơnau yal lùp sền  jơnau rơcăng cih Jơnau lơh nền tàm pơrjum, Củ ñiệm Ủy ƀan Tài cíñ, Kes priă Quôk hội dê ồng Lê Quang Mạnh pà gĭt, Ủy ƀan Tài cíñ, Kes priă đơs là, broă Cíñ phủ dan Quốk hội sền swì, lơh nền gơwèt mờ Jơnau rơcăng cih Jơnau lơh nền tàm pơrjum bơh Quốk hội bè tơrlòng bơtơl ờ uă gùng dà broă lơh krơi is bơtàu tơnguh càr Nghệ An là geh cơng tàng cíñ trị, cơng tàng adăt boh lam mờ di gơnăp gơnoar. Kung tàm drim òr (31/05), Quốk hội iăt pang sră yal mờ jơnau yal lùp sền jơnau rơcăng cih Jơnau lơh nền tàm pơrjum tam gơl, bơtơl Jơnau lơh nền tàm pơrjum bơh Quốk hội dê bè tơrlòng bơyai lơh broă gơnoar atbồ tiah drà mờ ờ uă gùng dà broă lơh krơi is bơtàu tơnguh ƀòn dờng Đà Nẵng.