Ală kwang bàng đơs, Cíñ phủ, Thủ tướng Cíñ phủ neh sền gròi đơng lam, geh uă broă lơh ndrờm bal, lơh pràn nàng kờp dŭ kes priă dà lơgar. Tàm hơ̆, tơmŭt tàm kes priă dà lơgar nam 2022 sơrlèt mờ kờp dŭ 28%, tơmŭt priă bơh ală tiah mpồl lơh sa dà lơgar, priă bơcri tơn bơh lơgar bơdìh, lơh sa bơdìh dà lơgar ndrờm geh mờ sơrlèt mờ kờp dŭ geh ai, ndrờm bal kes priă tă lơh jăt jơnau kờñ brồ guh wơl bơtàu tơnguh lơh sa mpồl bơtiàn nam 2022, gàr niam ală bơta ring bal dờng bơh gah lơh sa, tơmù dồs dà lơgar mờ tă uă kes priă.

Jơnau đơs pơn dŭt dơ̆ cri bơyai, Phó Củ tịc Quốk hội ồng Nguyễn Đức Hải sồr Cíñ phủ tơmù broă lơh, pơyoa jơnau tơn jơh kes priă lơyài; mờ tơmù ală bơta gam gơlik geh ờ pràn tàm broă atbồ, ngui kes priă bè: kờp dŭ lơh jăt broă tơmŭt, tă mờ lơh rơndăp broă kờp dŭ ờ di pal, sơrbì broă kờp dŭ lài, jào khà priă lồi nam uă geh tơngŏ gơguh, kung gam bơta ờ tơl tă dia, priă pal tă. Bơcri priă dà lơgar mờ dồs gam gơlời bơ̆t bơtàu tờm gam uă tàm mpồl kấp ală tiah.