VOV4.K’ho- Ngai do, ngai dơ̆ prao, ngai 10/06, Quôk hội bơyai lơh cribơyai bè Gùng dà bơcri priă lơh 5 Rơndăp broă lơh gùng lòt tờm ngan dà lơgar dê, tàm hơ̆ geh: gùng Pleh 4 tiah càr lơgar Hà Nội; gùng Pleh 3 ƀòn dờng Hồ Chí Minh; rơndăp broă lơh lơh gùng rơndeh ntoăt răt Châu Đốc- Cần Thơ- Sóc Trăng; Khánh Hoà- Buôn Ma Thuột; Biên Hoà- Vũng Tàu. Do là ală rơndăp broă lơh lơh jăt ngan ngồn kơrnoăt Pơrjum dờng dơ̆ 13 bơh Đảng dê mờ kơrnoăt 31 bơh Quôk hội dê bè rơndăp tăp sèng wơl lơh sa tàm  20 nam, lơh phan bơna gùng lòt mờ sơlơ tàm tơrbŏ bal kơnhoàl ù tiah.

Mho ngai 09/06, pơrjum dơ̆ 3, Quôk hội khoă XV neh lơh sir jơh dơ̆ lùp mờ hơ jơnau lùp geh lơh tàm 2 ngai mờ nggùl. Phó Thủ tướng Duh broă sùm Cíñ phủ ồng Phạm Bình Minh neh lơh loh ală broă geh gơrềng mờ hơ jơnau lùp bơh kwang bàng Quôk hội dê. Ală kwang bàng đơs, dơ̆ lùp mờ hơ jơnau lùp neh tơngŏ bơta tam gơl pa, dơ̆ do ờ geh bơnah Ƀộ trưởng yal cồng nha lơh geh bơh gah lơh broă he dê, den tàng bè hơ̆ geh uă tŭ jiơ nàng ală kwang bàng in lùp. Ală broă Quôk hội sac rwah lùp dơ̆ do ndrờm geh bơh bơta geh ngan, đơs wơl jơnau kơlôi sơnơng, bơta kơ̆p kờñ, jơnau đơs bơh cau tĕ khà mờ làng bol dê. Jơnau hơ bơh ală Ƀộ trưởng dê sền bal kung song dơ pă ngan, hơ tơn tàm ală broă, sền bal lơh di nùs geh ală jơnau kờñ mờ kwang bàng Quôk hội dê lùp.

Cau mblàng Lơ Mu K’Yến