VOV4.K’ho- Tàm 02 ngai, ngai do (01/06) mờ ngai hìng (02/06), Quôk hội cribơyai tàm hìu pơrjum bè sền swì bơtơl cồng nha lơh jăt broă rơndăp lơh bơtàu tơnguh lơh sa- mpồl bơtiàn mờ kes priă dà lơgar nam 2021; broă lơh jăt broă rơndăp lơh bơtàu tơnguh lơh sa- mpồl bơtiàn mờ kes priă dà lơgar ală nhai bồ nam 2022; Tơn jơh broă lơh jăt Kơrnoăt sồ 42 bơh Quôk hội dê bè lơh tơrlòng lài bơsong dồs ờ niam bơh ală mpồl ai càn priă jền dê.

Tàm dơ̆ sơnđờm mŭt pơrjum Quôk hội dê, Phó Thủ tướng Cíñ phủ ồng Lê Văn Thành sền jơnau yal đơs nền: Cíñ phủ tơlik 12 mpồl kơnòl broă broă lơh, tàm hơ̆ sền gròi ngan tơrgùm gròi sền kòp Kovid-19 mờ bơtàu tơnguh wơl mhar, bơtàu tơnguh lơh sa- mpồl bơtiàn kơ̆ kơl jăp. Lam lơh jăt ală Kơrnoăt bơh Pơrjum Dà lơgar 5 khoă 13 dê, ngan là broă ù tiah, lơh sa bal, lơh broă sa sươn sre, cau lơh broă sa mờ ƀòn lơgar; mhar lơh sir mờ yal mờ Quôk hội tam gơl Adat Ù tiah nam 2013. Cíñ phủ kung đơs nền lam lơh jăt kràñ cê jơh nùs ală broă lơh mhar ai priă bơcri dà lơgar; Mơkung tơnguh pràn jak bơh ală anih lơh sơnơm dê. Lam lơh niam dơ̆ pơrlòng jơh bơsram kâp pe mờ pơrlòng mŭt bơsram đại họk, kao đẳng nam 2022.

Cau mblàng Lơ Mu K’Yến