Pơn jat tai pơrjum dơ̆ 7, ngai do (25/5), Quôk hội lời jơh dùl ngai nàng cribơyai tàm hìu pơrjum bè Jơnau yal bơh Mpồl kwang bàng jat sền mờ jơnau rơcang cih Nghị quyết bơh Quôk hội dê bè cồng nha jat sền mìng 1 tơngume “broă lam lơh jat Nghị quyết sồ 43 nam 2022 bơh Quôk hội dê bè broă lơh priă jền dong kờl Broă lơh bơtàu tơnguh wơl, bơtàu tơnguh lơh sa – mpồl bơtiàn mờ ală nghị quyết bơh Quôk hội dê bè 2, 3 rơndap broă lơh kuơmàng dà lơgar tus jơh nam 2023. Bàr, pe broă lơh dong kờl tàm ală Nghị quyết do neh geh tŭ geh đơs là “phan pơrđồng dong kờl” ai uă mpồl lơh sa kă bro mờ cau lơh broă in sơrlèt gan kal ke tơnơ̆ kòp dờng Kovid-19.

Bơh mùl màl jat sền broă lơh jat Nghị quyết sồ 43 bơh Quôk hội dê ai gŏ, broă ai tơlik Nghị quyết do là broă lơh nền dipal, di tŭ tàm tŭ tơngai broă lơh sa – mpồl bơtiàn dà lơgar kong mờ uă kal ke tài gơ rềng kơn jơ̆ kơn jut bơh kòp Kovid-19 dê. Kơnờm bơh hơ̆, broă lơh sa geh bơta bơtàu tơnguh wơl pràn kơldang tàm nam 2022, mờ khà gơguh GDP geh rlau 8%, là khà gơguh jơnhua ngan rlau jơh tàm tơngai bơh nam 2011 tus nam 2022. Mpồl kwang bàng jat sền bơh Quôk hội dê kung đơs: Ală broă lơh dong kờl bè broă jền, ai càn priă tàm Nghị quyết sồ 43 neh di tŭ dong kờl bơta kơn jơ̆ bè priă jền ai ală cau kong gơ rềng kơn jơ̆ kơn jut tài bơh kòp Kovid-19 in tàm ală tŭ tơngai kal ke ngan rlau jơh.