Pơn jat tai pơrjum dơ̆ 4, Quôk hội khoă 15, drim ngai 24/10, tàm Hà Nội, Quôk hội cribơyai tàm hìu pơrjum bè 2, 3 tơngume gam geh jơnau đơs krơi is bơh rơndap lơh Adat kham kòp, sơm kòp (tam gơl) dê. Jơnau rơcang cih Adat kham, sơm kòp tam gơl tơnơ̆ tŭ bơsir geh 12 tap mờ 121 bơta, uă rlau 15 bơta pơndrờm mờ jơnau rơcang cih yal Quôk hội in tàm pơrjum dơ̆ 3, uă tơngume neh lơh sir jơh, bulah bè hơ̆, kung gam 2, 3 tơngume pal pơn jat tai geh cih dờp, tam gơl.

Gùt anih pơrjum dơ̆ 4, Quôk hội khoă 15

Adat kham, sơm kòp là adat kuơmàng bơh gah lơh sơnơm dê, ai tơlik lài gùng dà broă lơh atbồ mờ bơta bơtàu tơnguh kơ̆ kơljap bơh broă lơh sền gàr, sền gròi pràn kơldang să jan làng bol, geh gơ rềng uă ngan tus làng bol kung bè anih lơh sơnơm, kwang bàng lơh sơnơm; geh làng bol, gah lơh sơnơm kơp gơn, ơn uă bơta gơn kơnờm nàng kờñ tơnguh bơta niam sền gàr pràn kơldang să jan làng bol mờ lơh gơlik bơnàng jă adat boh lam kơ̆ kơljap ai broă lơh kham kòp, sơm kòp in. Den tàng, broă rơcang lài pal geh lơh nền nòn nàng jơnau rơcang cih Adat geh gàr bơta niam, geh bơta kơ̆ kơljap jŏ jòng.