Kung tàm mho ngai 06/06, Quôk hội neh lơh jơh broă lơh lùp mờ hơ jơnau lùp tàm pơrjum dơ̆ 07. Song dơ pă mờ geh kơnòl. Hơ̆ là jơnau sền gŏ bal bơh jơh ală kwang bàng Quôk hội mờ cau tĕ khà dê tàm 2 ngai mờ nggùl lùp.

Phó Thủ tướng Cíñ phủ ồng Trần Hồng Hà mờ 4 nă Ƀộ trưởng, kwang ătbồ gah broă neh hơ tơn dồ ròt broă mờ ală kwang bàng Quôk hội dê lùp. Ală kwang bàng Quôk hội neh geh jơnau lùp lơyah ngan, loh làng ngan, jăt tàm mpồl broă, đơs wơl di bơta geh ngan tàm rài kis; is ồn ờ ngòt đơs tus ală broă “duh hồl” tàm mpồl bơtiàn. Tàm nùs nhơm lùp tàm hìu pơrjum neh pà gŏ nùs nhơm song dơ pă, iăt kơno mờ geh kơnòl bơh ală “kwang đơng lam bồ” gah broă dê, nàng kờñ tă bơsong ală kal ke, kòl yan nàng bơtàu tơngguh lơh sa- mpồl bơtiàn. Hơ tềng đăp Quôk hội, Phó Thủ tướng Cíñ phủ ồng Trần Hồng Hà đơs sùm ală broă lơh đơng lam giă nàng kờñ sền gàr jơnau kờñ gròi sền roh giă priă tŭ lơh jăt tam gơl wơl priă nhai bơh ngai 01/07 tus.