VOV4.K’ho- Drim ngai 23/05, tàm Hìu lơh broă Quôk hội, bơh bơta đơng lam bơh Củ tịc Quôk hội ồng Vương Đình Huệ, Quôk hội neh sơnđờm mut pơrjum yŭ rơyùm Pơrjum dơ̆ 3, Quôk hội khoá 15.

Sơn đờm mut pơrjum dơ̆ 3, Quôk hội khoá 15

Lài mờ dơ̆ sơnđờm mut pơrjum, Củ tịc lơgar ồng Nguyễn Xuân Phúc, Thủ tướng Cíñ phủ ồng Phạm Minh Chính, Củ tịc Quôk hội ồng Vương Đình Huệ mờ ală kwang bàng Quôk hội neh ơn guàng bơkào, mut tàm Gơlang ƀồc còp ƀồc Củ tịc Hồ Chí Minh. Tàm dơ̆ pơrjum do, Quôk hội geh sền sơ wì, lơh nền gùng dà broă lơh bơcri priă 5 rơndap broă lơh phan bơna gùng lòt kwơ màng là Gùng pleh 4 tiah càr lơgar Hà Nội; Gùng pleh 3 ƀòn dờng Hồ Chí Minh; Gùng rơndeh ntoăt răt Biên Hoà- Vũng Tàu; Gùng rơndeh ntoăt rat Khánh Hoà- Buôn Ma Thuột; Gùng rơndeh ntoăt rat Châu Đốc- Cần Thơ- Sóc Trăng. Củ tịc Quôk hội ồng Vương Đình Huệ đơs ngan, ală kwang bàng Quôk hội tơrgùm ai jơnau đơs tă pơgồp bè bơta kờñ pal geh, bơta jal mhar bơh ală rơndap broă lơh dê; tàm pà dơ̆ bơcri priă; bơta ring bal, dùl nùs bal mờ ală broă lơh rơndap ù tiah bơh dà lơgar dê, tiah, ală tiah geh rơndap broă lơh lòt gan nàng kờñ gàr niam bơta niam bè tam pà ring bal khà priă mờ tàm broă lam lơh jat rơndap broă lơh dê, bơsong bơta lơh nền bơcri priă mhar mơya tŭ tơngai lam lơh jat lơyài, jŏ jòng, lơh hoàc huơr, tàm pà, lơh roh uă priă jền.

Cau mblàng K’Hạnh