Mờ geh uă kwang bàng pờ tê ring bal, Quốk hội neh ring bal Adăt Gùng lòt ù gờl mờ Adăt Lơngăp lơngai gùng lòt ù gờl. tềng đăp mờ ală jơnau đơs ờ ndrờm bal bè sèng 2, bơta 9, geh ai bè khà angkôl bơh cau măi rơndeh, Quốk hội neh bơyai lơh pờ tê ring bal bè bơta do.

Cồng nha pờ tê, geh uă kwang bàng Quốk hội ring bal mờ jơnau lơh nền tàm pơrjum: Kơrian ờ ai măi rơndeh lòt tàm gùng ù gờl mờ tàm mhàm bal mờ nhơm tă geh angkôl. Bơh tàm mùl màl tàm tơngai do geh ală kơnòm dềt gơtìp lời huĭ tàm rơndeh jun rò kơnòm bơsram, lơh gơtìp bơta moăt ngan, Ủy ƀan Duh broă sùm Quốk hội neh sồr Quốk hội bơtơl dùl jơnau lơh nền pa tàm Adăt Lơngăp lơngai gùng lòt ù gờl là rơndeh kă bro pơn diang kơnòm bơsram, kơnòm dềt mầm non ha là rơndeh pơn diang cau pơgồp bal mờ broă jun rò kơnòm bơsram, kơnòm dềt mầm non pal geh crăp phan kŭp rùp kơnòm bơsram, kơnòm dềt mầm non mờ phan geh gơnoar yal lài kơrian mờ lời huĭ kơnòm dềt tàm rơndeh.