VOV4.K’ho- Pơn jăt tai broă pơrjum dơ̆ 3, drim ngai 14/06, Quôk hội neh pờ tê ring bal Adat Kảñ sát kơ động mờ Kơrnoăt bè broă lơh Mpồl jăt sền tơngume is bơh Quôk hội dê nam 2023. Mờ 91,16% khà sră kwang bàng Quôk hội geh mat ring bal, Quôk hội neh ring bal Adat Kảñ sát kơ động. Adat geh 5 tăp, 33 bơta, cih: Kảñ sát kơ động là mpồl phàu crong làng bol gơwèt Kwang àng làng bol Việt Nam, là mpồl cau tờm lơh jăt broă lơh phàu crong sền gàr lơngăp lơngai dà lơgar, gàr niam bơta rơndăp tăp sèng, ờdo ờdă jơh gùt mpồl bơtiàn.

Adat cih ală broă lơh gơtìp kơryan ờ ai lơh, tàm hơ̆ geh broă kơryan ờ ai lơh broă tam dră wơl, lơh kơryan broă lơh bơh Kảñ sát kơ động dê. Kơryăn blơi nùs nhơm, pà kơñau priă jền halà geh broă lơh rồn bơklơn kwang bàng, cau ling Kảñ sát kơ động lơh tìs mờ gơnăp gơnoar, kơnòl broă geh jàu. Adat kung cih kwang bàng, cau ling Kảñ sát kơ động ki ngàm mờ sền gàr gơnoar, bơta kwơ dipal mờ kơrnoăt boh lam bơh anih lơh broă, mpồl lơh broă mờ cau dùl nă să is dê; ơm kis rềp mềl mờ làng bol, ki ngàm, duh rơngòt, jơh nùs jơh tồr drơng broă làng bol in. Khin cha, rơcăng ngac, tŭ lơi kung rơcăng lài tam lơh, lơh gơs niam jơh ală kơnòl broă geh jàu.

Cau mblàng Lơ Mu K’Yến