VOV4.K’ho- Tơnơ̆ 19 ngai lơh broă bal mờ nùs nhơm geh kơnòl uă, mho ngai 16/06, pơrjum dơ̆ 3 Quôk hội khoă XV neh lơh jơh niam tơngume bơh dơ̆ pơrjum dê mờ geh lơh pơrjum pơndŭt. Lài mờ tŭ Củ tịc Quôk hội ồng Vương Đình Huệ đơs pơndŭt pơrjum dơ̆ 3, Quôk hội khoă XV, ală kwang bàng pờ tê ring bal Kơrnoăt bè cồng nha jăt sền tơngume is “broă lơh jăt gùng dà broă lơh, kơrnoăt boh lam bè broă lơh rơndăp ù tiah kờp bơh tŭ Adat Rơndăp ù tiah geh ai lơh jăt”; Kơrnoăt bè lùp mờ hơ jơnau lùp.

Quôk hội kung neh pờ tê ring bal Kơrnoăt pơrjum dơ̆ 3, Quôk hội khoă XV, tàm hơ̆ geh broă tơn jŏ tơngai ai ngui jơh ală jơnau cih bơh Kơrnoăt sồ 42 nam 2017 bơh Quôk hội dê bè lơh tơrlòng lài bơsong dồs ờ niam bơh ală mpồl ai càn priă jền dê; tơngume gơrềng tus rơndăp broă lơh gùng Hồ Chí Minh mờ broă jun wơl priă càn rê ai càn wơl, ala măt Cíñ phủ gơ gơs ai pà kes priă dà lơgar mờ ală broă kwơmàng ndai bơh dà lơgar dê.

Cau mblàng Lơ Mu K’Yến