VOV4.K’ho- Mho ngai 11/01, tàm dơ̆ tơn jơh pơrjum nisơna dơ̆ 1, Quôk hội khóa 15, ală kwang bàng Quôk hội neh bơyai lơh pờ tê ring bal Nghị quyết lam lơh tơrlòng lài 2, 3 kơ cế, broă lơh krơi is bơtàu tơnguh ƀòn dờng Cần Thơ mờ 92,79 nă kwang bàng ring bal, Nghị quyết geh lam lơh ngan ngồn bơh ngai 01/3/2022 mờ geh lam lơh tàm 5 nam. Nghị quyết geh ring bal geh bơsong ală bơta kòl yan nàng Cần Thơ tơnguh ală bơta pràn, bơta ƀuơn, gơ hòi gơ jà ală bơta pràn nàng bơcri tàm ală gah geh bơta pràn nàng bơtàu tơnguh mhar, kơ̆ kơljap, mhar gơ gơs là tiah drà tờm bơh tiah ring dà dờng Cửu Long dê mờ uă bơta pràn, bơta ƀuơn nàng bơtàu tơnguh bè lơh sa suơn sre, lơh sa mờ măi mok, nhơl chờ, kă bro bal mờ lơh broă bal dunia. Broă Quôk hội ring bal Nghị quyết lam lơh tơrlòng lài 2, 3 kơ cế, broă lơh krơi is bơtàu tơnguh ƀòn dờng Cần Thơ geh là bơnàng jă nàng Cần Thơ chồl mhar bơtàu tơnguh tàm tơngai tus.

Cau mblàng K’Duẩn