VOV4.K’ho- Mho ngai òr (07/06), Quôk hội sơn đờm dơ̆ pơrjum lùp mờ hơ jơnau lùp sơn rờp tàm tơngai 2 ngai mờ nggùl, lam lơh lùp mờ hơ jơnau lùp. Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan là cau lài ngan hơ jơnau lùp tềng đap Quôk hội.

Đơs tàm dơ̆ mut lơh lùp mờ hơ jơnau lùp, Củ tịc Quôk hội ồng Vương Đình Huệ pà git, broă lơh lùp mờ hơ jơnau lùp tàm dơ̆ pơrjum do geh bơyai lơh jat broă lơh ai mpồl broă lơh tờm, broă gơ wèt kơnòl bơh cau lơi dê, cau hơ̆ geh kơnòl hơ. 4 mpồl broă lùp gơ wèt gah atbồ dà lơgar bơh ală Ƀộ: Tài cíñ, Nông nghiệp mờ Phát triển Nông thôn, Giao thông Vận tải, Ngân hàng dà lơgar tàm dơ̆ pơrjum do. Bè broă lơh sa suơn sre, hìu pơrjum Quôk hội gơ lơh duh hồl ngan mờ ală jơnau lùp bè bơta gơbàn sùm “tơnhàu geh uă mơya tac ờ yòm” mờ ală dơ̆ dong kờl phan lơh gơs bơh suơn sre ờ hềt tơn jơh; bơta giă phơng sih, sơnơm sền gàr phan tam, phan siam phan ròng, ală bơta phan bơna drơng broă lơh sa suơn sre geh priă blơi gơguh kas. Hơ jơnau lùp bơh ală kwang bàng Quôk hội dê, ală broă lơh mờ Ƀộ trưởng ồng Lê Minh Hoan đơs nền hơ̆ là broă rơndap wơl lơh sa, hòi jà làng bol mut tàm Hợp tak xã. Mờ kung đơs nền tus bồ tơngoh kơlôi sơnơng tam gơl bơh lơh broă sa suơn sre gơs bồ tơngoh kơlôi sơnơng lơh sa suơn sre.

Bơh tàm broă iăt mờ sền jơnau mblàng đơs bơh Ƀộ trưởng Nông nghiệp mờ Phát triển Nông thôn ồng Lê Minh Hoan, ồng Nay Hứ, 66 sơnam, cau tĕ khà tàm sơnah ƀòn Tây Sơn, ƀòn dờng Pleiku, càr Gia Lai sền gròi ngan tus mờ ală broă lơh bơh Ƀộ trưởng ai geh gơwèt mờ broă khà priă phan lơh sa suơn sre gơguh uă bè tŭ do. Ồng Nay Hứ kơ̆p kờñ, tơnơ̆ mờ pơrjum do, Ƀộ trưởng Nông nghiệp mờ Phát triển Nông thôn geh rơndăp broă lơh mùl màl di pal mờ ală càr, ƀòn dờng, ù tiah tàm broă bơsong ală broă gơtìp kal ke tàm broă tơnguh bơtàu lơh sa suơn sre: “Kơ̆p kờñ tơnơ̆ mờ pơrjum do, Ƀộ trưởng geh rơndăp broă lơh mùl màl, đơng lam, bơto sồr loh làng tus tơl tiah, ù tiah mùl màl di pal. Bè tàm Tây Nguyên, mìng là lơh sa suơn sre, lơh bè lơi nàng đơng lam broă lơh sa suơn sre bơh tiah Tây Nguyên dê di gùng dà, geh cồng nha rơlao”.

Ngai do (08/06), Ƀộ trưởng Nông nghiệp mờ Phát triển Nông thôn ồng Lê Minh Hoan pơn jăt tai hơ jơnau lùp tềng đăp Quốk hội. Pơn jăt mờ hơ̆ là dơ̆ lùp mờ hơ jơnau lùp bơh Ƀộ trưởng Ƀộ Tài cíñ ồng Hồ Đức Phớc mờ Thống đốk Ngân hàng Dà lơgar Việt Nam mò Nguyễn Thị Hồng.

Cau mblàng K’ Duẩn-Ndong Brawl