Pơgăp mờ do mờr 50 nam rê hờ lài, git nđờ rơbô nă ùr ơruh, klao pơnu neh tơngăc Càr lơgar nàng mŭt tàm tiah hờ đah jum Tây Nguyên rồ ù lơh sa jăt jơnau hòi jà lòt bơ̆t bơtàu tiah lơh sa pa dê. Phan bơh ală cau do dê ờ mìng là bơta pràn kơnòm să mờ gam là bơta tờm, nùs nhơm bơh ƀòn lơgar dê nàng bơ̆t bơtàu gơs dùl kơnhoàl bơtàu tơnguh. Ală cau do cèng bal ală ù tiah mờng kwèng bè Mê Linh, Gia Lâm, Từ Liêm, Đông Anh... Nàng sơnđan măt ai ală ƀòn, xã tàm ƀòn lơgar pa in. Xã Liên Hà, kơnhoàl Lâm Hà tŭ do là măt sơnđan bơh dùl xã tàm kơnhoàl Đan Phượng, ƀòn dờng Hà Nội dê. Mò Nguyễn Thị Bích Hạnh jăt cau tàm hìu nhă tus càr Lâm Đồng bơh dềt, tŭ do neh là Củ tịc Mpồl cau ùr xã Liên Hà pà git, gùt xã geh rơlao 2 rơbô hìu làng bol mờ di pơgăp 9 rơbô nă cau. Làng bol sùm tơlik nùs nhơm tam klăc bal tàm lơh broă sa. “Gơwèt mờ Liên Hà den nùs nhơm tam klăc bal bơh oh mi cau ùr tàm broă lơh jăt broă bơ̆t bơtàu ƀòn lơgar pa neh gơguh uă. Oh mi cau ùr neh lơh gơs ală mpồl lơh broă bal tam tờm jơu ròng tu tàm tiah làng bol kòn cau. Oh mi cau Cil, K’ Ho neh tus bal tam tờm jơu, geh dong kờl càn priă bơh Anih bơto pơlam lơh sa suơn sre nàng blơi cèng tam, sơnka sền gàr tờm jơu mờ blơi sơntìl tờm jơu pa. Bơh tŭ hơ̆ rài kis oh mi geh gơguh loh làng, tài neh geh priă pah ngai nàng ngui tàm rài kis”.

Tus tŭ do, priă geh tơl nă cau tàm kơnhoàl Lâm Hà, càr Lâm Đồng geh rơlao 52 tơlăk đong, gơguh uă rơlao 2 dơ̆ nggùl pơn drờm mờ 10 nam lài; khà hìu rơƀah kung gơmù uă ngan mờ tŭ do mìng gam 1,68%; 100% khà xã neh geh dờp geh khà ƀòn lơgar pa; là kơnhoàl dơ̆ 5 càr Lâm Đồng dê geh Thủ tướng Cíñ phủ dờp là kơnhoàl geh khà ƀòn lơgar pa tơngai bơh nam 2016 tus 2020; mờ pơn-iờ să geh Củ tịc lơgar jào pà Gai lòng Lơh broă khà pe.

Lơh sa mpồl bơtiàn bơtàu tơnguh, rài kis niam chài nùs nhơm bơh làng bol ală kòn cau kis tàm kơnhoàl Lâm Hà dê-do là tiah lơh sa pa bơh cau Hà Nội tàm càr Lâm Đồng kung gơguh uă. Ồng K’ Thế, Phó Kwang atbồ Anih niam chài yal tơngit mờ tàp pràn să jan kơnhoàl Lâm Hà pà git, tàm ală broă lơh niam chài, tàm hơ̆ uă ngan là broă dờng tàm kơnhoàl dê, sùm ai tơngŏ geh bơta niam chài bơh cau Hà Nội bal mờ cau kòn cau kis bơh yau tàm do dê. “Măt sơnđan “Lâm – Hà” là jơnau tơrgùm wơl bơh măt sơnđan bơh bàr tiah Lâm Đồng mờ Hà Nội dê, den tàng bơta tam klăc bơh ală kòn cau tàm kơnhoàl niam ngan, kung kơnờm bơh tàm broă dong kờl bơh Đảng mờ Dà lơgar dê. Ờ mìng làng bol kòn cau mờ Đảng, Dà lơgar kờñ ngan prăp gàr ală bơta niam chài ờs mờng bè cing mồng, prăp gàr ală jơnau đơs pơn đik. Kơ̆p kờñ Đảng, Dà lơgar sền gròi, dong kờl prăp gàr bơta niam chài kòn cau dê. Nàng tơnơ̆ do lơh sa geh bơtàu tơnguh rơlao, geh ngui uă bơta gơguh jăk bơh măi mŏk dê uă rơlao tàm broă lơh sa. Tàm broă prăp gàr bơta niam chài den bol añ kơ̆p kờñ geh ai bơto tàm ală hìu bơsram, ơdŭ bơsram bè dròng cing, đơs jơnau pơn đik. Geh pơgồp bal tàm broă dong kờl ală kơnòm dềt in wă bè bơta niam chài kòn cau dê mờ dong kờl geh prăp gàr bơta niam chài ờs mờng bơh kòn cau dê nàng rơnàng tơnơ̆ do in”.

Ồng Trần Văn Hiệp, Củ tịc UɃÑZ càr Lâm Đồng đơs niam ală cồng nha kwơ màng mờ kơnhoàl Lâm Hà neh lơh ngan mờ lơh geh tàm tơngai do, mờ đơs tờm broă bơ̆t bơtàu ƀòn lơgar pa neh mùl màl gơs broă bơtàu tơnguh pràn kơl dang, uă tiah tàm gùt càr, geh bal ală mpồl lơh broă cíñ trị mờ làng bol dờp lơh bal. Gùt càr neh geh 107 tàm 111 xã geh khà ƀòn lơgar pa, 2 ƀòn dờng lơh gơs kơnòl bơ̆t bơtàu ƀòn lơgar pa mờ 5 kơnhoàl geh dờp geh tơl khà ƀòn lơgar pa. Ồng Trần Văn Hiệp đơs: “Nàng pơn jăt tai ngui ală cồng nha neh lơh geh, bol añ sồr tàm tơngai tus, kơnhoàl Lâm Hà lơh pràn broă lơh niam wơl broă lơh sa suơn sre, tam gơl pa broă gơguh lơh sa, bơ̆t bơtàu ală tiah lơh gơs phan bơh suơn sre tơrgùm bal di pal mờ bơta niam mờ jòi geh anih lơh gơs. Ngui uă ngan bơta geh, bơta pràn bơh kơnhoàl dê, hòi jà jơh ală bơta pràn tàm broă bơcri priă bơtàu tơnguh lơh sa mpồl bơtiàn. Gàr niam broă tơmù rơƀah kơl jăp, gàr niam rài kis lơh sa mpồl bơtiàn. Pơn jăt tai ngui bơhiàn ờs mờng tam klăc bal, pơgồp bal uă rơlao tai, mùl màl rơlao tai tàm broă bơtàu tơnguh bal càr Lâm Đồng dê”.