Kơnhoàl Ia Pa, càr Gia Lai geh crơng gơs nam 2002, mờ 9 xã. Tàm hơ̆, geh 07 xã kal ke ngan. Bulah bè hơ̆, bal mờ bơta tam klăc bal, ring bal bơh jơh ală anih lơh broă cíñ trị dê, nùs nhơm tơrgùm bal pràn dùl nùs bal bơh ală rơnàng làng bol dê, tus tŭ do, muh mat kơnhoàl Ia Pa, càr Gia Lai neh geh uă tam gơl pa, neh geh 02 xã, là: Ia Mrơn mờ Ia Tul lơh geh ƀòn lơgar. Priă lơh geh kờp bal dùl nă cau pah nam rlau 40 tơlak đong. Bi R’ô Hôk ơm tàm ƀòn Marin 3, xã Ia Mrơn, kơnhoàl Ia Pa, pà gĭt: Ƀòn Marin 3, xã Ia Mrơn, kơnhoàl Ia Pa uă ngan là làng bol kòn cau Jrai lơm. Lài do, rài kis làng bol dê jơgloh rƀah bòl glar ngan tài bơh lơh sa sươn sre jăt bè lài, gùng lòt kal ke ngan. Bal mờ bơta tơryăng tơryồng kong bòl glar kal ke tàm lơh broă lơh sa mờ bơta sền gròi bơh Đảng dê, Dà lơgar bơcri priă, dong kờl, ƀòn Marin 3 neh tam gơl uă, gùng lòt rê ƀươn ƀoài, hìu pơrjum mpồl bơtiàn, ƀlàng tàp pràn să jan, hìu bơsram geh lơh niam tre. Làng bol ƀòn lơgar neh gĭt ngui bơta jak chài măy mok dê nàng sền gàr chi tam, phan ròng, gĭt lơh kòi sre. Kơnờm bè hơ̆, tus tŭ do ƀòn Marin 3 neh geh uă hìu klàs bơh rƀah, rài kis làng bol geh bơtàu tơnguh rlau mờ lài uă ngan, ală hìu pa geh lơh là cơng tàng tơngŏ ai bơta tam gơl pah ngai bơh ƀòn dê in.

Tàm ală nam do, tàm ală kơnhoàl: Tu Mrông, Đăk Tô, Đăk Hà, Kon Plông, Kon Rẫy bơh càr Kon Tum dê geh uă krơh đoàn viên, ơruh pơnu cau Sơdàng lơh sa jak mờ bơt bơtàu geh rài kis hờm ram, gơboh gơbài. Pơn rơ ngan là ală broă lơh Mpồl lơh bal, Hợp ták xã tam, lơh sơnơm chi che; dròng cing jañ mồng tamya xoang… bơh đoàn viên, ơruh pơnu dê tàm ală kơnhoàl Tu Mrông mờ Kon Plông. Bal mờ gah lơh sa suơn sre, uă đoàn viên, ơruh pơnu gam lam lài tàm broă lòt lơh broă hờ lơgar ndai, dờp bơta chài mai mok ngui tàm broă lơh sa. Bi Y Za Nhi, 28 sơnam ơm tàm thôn Mô Bành 1, xã Đăk Na, kơnhoàl Tu Mơ Rông đơs: “Pal git loh lơh bè lơi nàng bol he geh dùl rài kis kơ̆ kơljap, lơh sa bơtàu tơnguh, kuơmàng là rơnàng kơnòm să ơruh pơnu tŭ do pal sơlơ tryăng tryồng bơsram sră, tryăng tryồng lơh broă nàng bơtàu tơnguh lơh sa hìu bơnhă. Rơnàng kơnòm să bol he bañ kơp gơn mờ pal sơrlèt gan kal ke, bơta lòng, bañ alah, mìng git ngui sa den ờ tŭ lơi geh rài kis bơtàu tơnguh ờ. Añ geh jơnau tơngkah mờ ală bơyô kơnòm să là git kơlôi sơnơng tĕ, pơlam tàp tĕ să tờm he, ờ ngòt kal ke, lơh ală broă geh kuơ ai hìu bơnhă, să tờm in, geh pơn đơl pràn den kơp kơnờm bol he rơp geh rài kis bơtàu tơnguh bè tơl nă cau ndai.