Tàm càr Dăk Lăk, broă gùt làng bol sền gàr lơngăp lơngai Dà lơgar neh geh ală broă lơh bơtàu tơnguh pràn kơl dang, jrô ơnàng bơh càr tus tàm ală ƀòn. Uă broă tơrlòng lơh sền gàr is bè lơngăp lơngai, ală mpồl rơcang kơrian cau tìs lơh geh cồng nha.

Đơs tàm ngai chờ, Trung tướng ồng Lê Quốc Hùng, Thứ trưởng Ƀộ Kwang àng đơs nền: Càr Dăk Lăk tiah tàm gùl Tây Nguyên dê geh ù tiah kwơ màng ngan bè lơngăp lơngai, cíñ trị, lơh sa, niam chài mpồl bơtiàn. Trung tướng sồr, càr Dăk lăk pơn jăt tai lơh pràn broă gùt làng bol sền gàr lơngăp lơngai Dà lơgar, pơgồp bal tàm broă lơh gơguh mờ bơtàu tơnguh gơnoar, bơta pràn dờng màng bơh làng bol dê.