VOV4.K’ho- Ală ngai do, tàm tiah nhàr dà lơgar ală càr Tây Nguyên, geh lơh uă broă lơh duh hồl tơngkah Ngai chờ sền gàr tiah nhàr dà lơgar jơh gùt làng bol ngai 03/3, gơ hòi gơ jà gal ngan làng bol ală jơi bơtiàn kòn cau tàm ƀòn lơgar tus bal. Tàm tiah nhàr dà lơgar 2 càr Dăk Lăk mờ Dăk Nông, Gah đơng lam mpồl ling sền gàr tiah nhàr dà lơgar 2 càr neh jàu pà ală bơta phan geh kuơ, ngan ngồn, pơn jờng làng bol tiah nhàr dà lơgar jơh nùs tus bal sền gàr gơnoar tờm tiah nhàr dà lơgar.

Càr Dăk Lăk geh gùng nhàr dà lơgar jòng rlau 73 kơi sồ rềp mờ càr Mondulkiri, lơgar Campuchia. Tiah nhàr dà lơgar càr Dăk Lăk dê geh 4 xã, gơ wèt 2 kơnhoàl Buôn Đôn mờ Ea Súp, là tiah ơm kis bơh rlau 22 rbô nă làng bol gơ wèt 26 jơi bơtiàn kòn cau. Nam 2021, kấp ủy, gơnoar atbồ ală tiah neh pơgồp bal jơh nùs mờ mpồl ling sền gàr tiah nhàr dà lơgar sền gàr kơ̆ kơljap gơnoar tờm ù tiah, lơngap lơngai tiah nhàr dà lơgar, sền gàr kơ̆ lơngap lơngai tàm ƀòn lơgar. Mùl màl, tàm ală xã tiah nhàr dà lơgar neh geh 26 mpồl bal, rlau 480 hìu bơnhă, rlau 1 rbô 600 nă cau cih mat tus bal sền gàr is gùng nhàr dà lơgar, jrong nhàr dà lơgar. Bơdìh hơ̆ tai, làng bol tàm 51 thôn, ƀòn tiah nhàr dà lơgar gam kĭ jơnau hơ pơrgon tus bal rơcang sơndră cau tìs, broă lơh tìs tàm mpồl bơtiàn.

Ngai chờ sền gàr tiah nhàr dà lơgar tàm càr Dăk Nông

Jat mò Trần Lệ Thủy, Ƀí thư Đảng ủy xã Ia Rvê pà git, srơh Jơh gùt làng bol tus bal sền gàr gơnoar tờm ù tiah, lơngap lơngai tiah nhàr dà lơgar tàm tŭ tơngai pa neh tơnguh nùs nhơm tus bal is bơh làng bol dê, tus bal lòt sền tiah nhàr dà lơgar, di tŭ kơryan ală broă lơh lơh tìs adat boh lam: “Tơngai rềp ndo, làng bol lơh jat kơrnuat tiah nhàr dà lơgar jơh nùs ngan. Bơta lơh tìs kơrnuat tiah nhàr dà lơgar nàng lam lơh broă mus kơl, nting mòc phan brê tài jơnau kờñ priă jền neh geh tơrmù. Làng bol git wă tơl nă làng bol geh là dùl jrong kis nàng sền gàr gơnoar tờm lơngap lơngai tiah nhàr dà lơgar. Ờ mìng làng bol git wă ờ lơh tìs kơrnuat tiah nhàr dà lơgar mờ làng bol gam là cau yal tơnggit ai kấp ủy, gơnoar atbồ tàm ƀòn lơgar in kung bè pôs ling sền gàr tiah nhàr dà lơgar in tŭ geh ală cau krơi sơ bơi mut, cau kờñ dô gan tiah nhàr dà lơgar”.

Càr Dăk Nông geh gùng nhàr dà lơgar jòng rlau 140 kơi sồ rềp mờ càr Mondulkiri, lơgar Campuchia lòt gan ù tiah 7 xã tiah nhàr dà lơgar. Tàm Ngai chờ sền gàr tiah nhàr dà lơgar jơh gùt làng bol bơyai lơh tàm ală xã tiah nhàr dà lơgar, bal mờ ală broă lơh niam chài, đơs crih tamya cèng bơta krơi is jơi bơtiàn kòn cau dê, ală kwang bàng neh tam pà mờng chài tàm broă lam lơh ală srơh tàm pơrlòng tàm kấp hơ đơm. Pơn rơ bè tàm xã Thuận An, kơnhoàl Dăk Mil, 6 mpồl sền gàr is gùng nhàr dà lơgar neh jơh nùs tus bal mờ Mpồl sền gàr tiah nhàr dà lơgar, sền gàr gùng nhàr dà lơgar, jrong nhàr nhàr dà lơgar. Nam lài, uă hìu bơnhă làng bol tàm xã neh ai is ù, ai jồm hìu tàm mìr nàng kwang bàng in lơh anih gròi sền, lam lơh kơnòl rơcang sơndră lik mờ mut tàm lơgar he tìs mờ adat boh lam mờ rơcang sơndră kòp Kovid-19 tàm tiah nhàr dà lơgar.

Kwang đơng lam bồ kơnhoàl Ea Súp, càr Dăk Lăk pà phan ală cau ling sền gàr tiah nhàr dà lơgar in

Tàm ngai chờ sền gàr tiah nhàr dà lơgar jơh gùt làng bol tàm xã Thuận An, Gah đơng lam Mpồl ling sền gàr tiah nhàr dà lơgar càr Dăk Nông neh jàu pà gai lòng kir sơnrai Tài gơnoar tờm lơngap lơngai tiah nhàr dà lơgar ai 1 nă cau geh uă tă pơgồp tàm broă lơh atbồ, sền gàr gơnoar tờm, lơngap lơngai tiah nhàr dà lơgar. Ủy ƀan Mặt trận dà lơgar Việt Nam càr Dăk Nông mờ Mpồl ling sền gàr tiah nhàr dà lơgar càr jàu pà 2 nơm hìu tam klac dờng ai ală hìu bơnhă geh rài kis kal ke in. Ala mat gơnoar gơnoar tàm ƀòn lơgar neh jàu sră jờng rơ ai ală mpồl bal, cau dùl nă să geh cồng nha jak ngan tàm broă lam lơh srơh jơh gùt làng bol tus bal sền gàr lơngap lơngai tiah nhàr dà lơgar nam 2021; pà phan ai cau geh bơngă pin dờn, hìu bơnhă rƀah tàm xã Thuận An in. Mpồl ling sền gàr tiah nhàr dà lơgar càr Dăk Nông jàu 7 bơnah phan pà ală kơnòm bơsram tàm broă lơh Dong oh tus hìu bơsram mờ Kòn ròng pôs ling sền gàr tiah nhàr dà lơgar tàm Thuận An.

Cau mblàng K’Duẩn