Tơnơ̆ mờr 2 nam mut lơh jal mhar, rơndap broă lơh neh lơh sir lài mờ broă rơndap broă 3 nhai. Gùng lòt mhar Nha Trang - Cam Lâm bơh Tập đoàn Sơn Hải lơh cau tờm bơcri priă rlau 7 rơbồ 600 tơmàn đong, kờp jơh bơta jòng rlau 49 kơi sồ, gơ ơm tàm ù tiah càr Khánh Hòa dê. Rơndap broă lơh geh lơh mờ bơta ơnàng 4 bơnàng gùng rơndeh lòt, gùng dờng ơnàng 17 thơk, mut lơh broă ai bơsir wơl priă bơcri pơgap rlau 16 nam.

Tus tơngai tŭ do, rơndap broă lơh sền bal là neh lơh sir. Cau bơcri priă gam tơrgùm hòi jà măi mok, phan bơna, mpồl cau lam lơh tàm gùt gơl gùng nàng lơh sir ală bơta tàm gùng lồi dŭt bơh rơndap broă lơh dê, bè: Lă bêtông đùh duh tăp lồi dŭt, sơng còr wăc sềr tam cah bơnah gùng, tam cah đah gùng lòt mhar, crăp pơng gàr gùt dar, crăp ală ƀong đèng sòl àng, crăp kƀàng sơñio gùng, jơnau yal tơngĭt lài, lơh niam wơl măt gùng. Kờp dŭ gùng lòt mhar Nha Trang- Cam Lâm sơnđờm ai lòt rê tàm ngai 19/05 tus.