Poh dut ndơl nhai 8, pơgru Hìu bơsram kâp 2 mờ kâp 3 Lê Hữu Trác lòt còp hìu bơnhă bàr nă oh mi tờm Thị Chúc mờ Thị Yêm, kòn cau M’Nông ơm tàm thôn Tân Bình, xã Dăk Ngo, kơnhoàl Tuy Đức, càr Dăk Nông. Bàr nă oh gam dong hìu bơngă jì nhơt, ơn phơng tờm kơphe in. Hìu bơnhă oh gơ wèt hìu bơnhă rƀah, mìng geh bèp là cau lơh broă tờm, mè gơtìp gơ drồl mhàm tơngoh, bi klau gơtìp rềs àr. Oh Thị Chúc ngoh rơngac ngan tŭ ală pơgru lòt còp mờ pơn dờm pơnđiang: “Hìu bơnhă sau kal ke, geh pơgru, mè bèp pơn dờm pơnđiang nàng sau lòt bơsram. Nam bơsram pa, sau neh geh tơl sră pơ àr. Sau rơp lơh ngan bơsram sră tài mè bèp sau dê”.

Ồng Điểu Thắng, bèp bàr nă oh mi Thị Chúc mờ Thị Yêm dê pà git, bàr nă kòn ùr neh 15 sơnam, mờr gơ gơs là cau lơh broă tờm, mơya ồng kung gam sồr ală kòn pal lòt bơsram nàng tơnơ̆ do rài kis ờ huan kal ke tai. Kơnờm geh ală broă lơh dong kờl bơh Đảng, Dà lơgar dê mờ ală kòn ồng dê ờ càng pal sang tĕ bơsram nggùl gùng: “Hìu bơnhă añ kal ke ngan, ơm ngài hìu bơsram tai, kung kơnờm geh bơta sền gròi bơh Đảng, Dà lơgar, hìu bơsram dê, dong kờl ală sau in priă sa, priă ơm, priă lòt rê. Añ kung lơh ngan pơn dờm pơnđiang ală kòn lơh ngan lòt bơsram nàng git sră, git kờp dŭ nàng rài kis tơnơ̆ do ờ huan bòl glar tai”.

Ồng Nguyễn Thế Hiệt, Atbồ Hìu bơsram kâp 2 mờ kâp 3 Lê Hữu Trác, xã Dăk Ngo, kơnhoàl Tuy Đức, càr Dăk Nông pà git, tàm tiah uă kal ke, uă kơnòm bơsram gơ gơs là cau lơh broă tờm tàm hìu bơnhă tŭ mìng pa rơp 15, 16 sơnam. Nàng gàr tơl khà kơnòm bơsram lòt bơsram, mpồl atbồ hìu bơsram mờ pơgru sùm rê tàm ală ƀòn hòi jà ală oh lòt bơsram. Tŭ lòt hòi jà, pơgru mblàng yal bè ală broă lơh dong kờl bơh Đảng, Dà lơgar dê lời ai kơnòm bơsram tiah sar lơgar ngài, tiah jơi bơtiàn dồ êt nă cau in; dong mè bèp, kơnòm bơsram git bơta kuơ bơh broă bơsram dê gơ wèt mờ rài kis: “Mpồl atbồ hìu bơsram bal mờ pơgru atbồ ơdŭ bơsram, pơgồp bal mờ ală thôn, ƀòn, gơnoar atbồ tàm ƀòn lơgar lòt hòi jà ală oh lòt bơsram. Bè broă dong kờl den xã tiah 3, tiah uă kal ke den tàng geh 2 broă lơh dong kờl Jat jơnau lơh nền sồ 81 bơh Cíñ phủ dê dong priă tă bơsram mờ Jơnau lơh nền sồ 116 bơh Cíñ phủ dê bè dong kờl phe, priă sa, priă ơm ală oh in, niam ngan”.

Ồng Phan Thanh Hải, Kwang atbồ Sở Bơto bơtê mờ bơsram càr Dăk Nông pà git, càr sền gròi uă ngan tus kơnòm bơsram tiah sar lơgar ngài, tiah jơi bơtiàn dồ êt nă cau. Rơcang ai nam bơsram pa in, gah bơto bơsram pơgồp bal mờ ală anih lơh broă cíñ trị tàm kâp hơ đơm rơcang lài rê tus tơl ƀòn nàng git bè bơta geh ngan mờ hòi jà kơnòm bơsram lòt bơsram. Gơ wèt mờ ală kơnòm bơsram geh rài kis kal ke den gah do rơp jòi ală broă lơh nàng dong kờl. Gùng dà bơh gah bơto bơsram càr dê là ờ lời kơnòm bơsram pal sang tĕ bơsram tài bơh rài kis kal ke.

Tŭ do, ală broă lơh dong kờl ai kơnòm bơsram tiah sar lơgar ngài, tiah jơi bơtiàn dồ êt nă cau jat Jơnau lơh nền sồ 116 bơh Cíñ phủ dê nam 2016 mờ Jơnau lơh nền sồ 81 bơh Cíñ phủ dê nam 2021 gam lơh geh cồng nha niam ngan tàm càr Dăk Nông. Tàm ală nam bơsram 2022 – 2023 mờ 2023 – 2024 neh geh rlau 14 rbô nă kơnòm bơsram tàm càr geh dong kờl priă sa, priă ơm, dong kờl priă tă bơsram, kờp jơh mờr 21 tơmàn đông. Ồng Phan Thanh Hải pà git: “Tàm ală nam do, ală broă dong kờl bơh dà lơgar mờ càr dê neh sền gròi uă ngan tus oh kòn, kơnòm bơsram tàm tiah sar lơgar ngài, tiah jơi bơtiàn dồ êt nă cau. Kuơmàng geh 2 Jơnau lơh nền bơh Cíñ phủ dê geh ai ngui ngan ngồn là Jơnau lơh nền sồ 116 mờ Jơnau lơh nền sồ 81 bơh Cíñ phủ dê. Broă dong kờl do geh ai ngui ngan ngồn, dong kờl, pơn jờng ală sau tiah sar lơgar ngài, ngan là ală oh tiah jơi bơtiàn dồ êt nă cau geh tai bơta dong kờl lòt bơsram niam rlau, tơrmù khà kơnòm bơsram sang tĕ bơsram uă ngan tàm ală nam lài”.

Ală ngai do, kơnòm bơsram tiah sar lơgar ngài, tiah jơi bơtiàn dồ êt nă cau bơh càr Dăk Nông dê đơs is, Tây Nguyên dê đơs bal gam hô hơng ngan lòt bơsram wơl. Bal mờ bơta lơh ngan, bơta pơn đơl pràn bơh gah bơto bơsram dê, ală pơgru rê tàm ală ƀòn, ală broă dong kờl bơh Đảng, Dà lơgar dê gam lơh ngan dong kờl ală oh sơrlèt gan kal ke wèt tus rài tơnơ̆ do niam bơnĕ.