Jat jơnau yal bơh Mpồl Lơngăp lơngai gùng lòt càr Kon Tum, pơgap 9 jiơ mang ngai 25/02, tàm gùng Hồ Chí Minh, gơl lòt gan thôn 4, xã Diên Bình, kơnhoàl Đăk Tô, rơndeh ôtô geh ƀàng sồ 82A-09582 bơh cau măi rơndeh Nguyễn Văn Du (44 sơnam), ơm tàm xã Sa Sơn, kơnhoàl Sa Thầy, càr Kon Tum măi tàm rơndeh geh 3 nă cau lòt bơh kơnhoàl Đăk Tô tus kơnhoàl Đăk Hà.

Tŭ lòt tus Kơi sồ 1518+100, rơndeh ôtô tam tơm mờ rơndeh măi geh ƀàng sồ 82F1-03391 bơh A Thuê (20 sơnam) pơndiang bal A Thom (14 sơnam) ơm bal tàm thôn Đăk Kang Pêng, xã Diên Bình, kơnhoàl Đăk Tô, lòt sơlơ̆u gùng. Dơ̆ rềs àr lơh A Thuê mờ A Thom chơ̆t tơn, 2 nơm rơndeh ờ diơng kơn jơ̆ ngan. Dờp geh jơnau yal, mpồl lơh broă geh gơnoar mhar ngan geh mat tàm tiah gơtìp rềs àr gàr niam lơngăp lơngai gùng lòt, mơkung lam lơh broă lùp khàu jơnau gơbàn tus dơ̆ rềs àr.