Tơnơ̆ 2 nam sùm gơmù rềs àr gùng lòt, tàm 5 nhai bồ nam 2024 bơta rềs àr gùng lòt tàm ù tiah càr Dăk Nông gơlik geh kal ke, mờ 57 dơ̆ rềs àr gùng lòt lơh 37 nă cau chơ̆t, 38 nă cau sồt să. Pơndrờm dùl tŭ bal mờ nam 2023, rềs àr gùng lòt tàm càr Dăk Nông gơguh jơh bal bè dơ̆, khà cau chơ̆t mờ cau sồt să.

Jơnau tờm gơbàn uă ngan là bơh bơta gĭt wă lơh jat adat boh lam bơh cau lòt rê tàm gùng dê kung gam ờ hềt uă, broă bơsong ală bơta kal ke bè ai lòt rê tàm gùng tàm càr dê ờ hềt di tŭ.

 Bè ală broă lơh gàr niam lơngap lơngai lòt rê tàm gùng tàm tơngai tus, Thượng tá ồng Phạm Quốc Lập, Kwang atbồ Cơldŭ lơh broă Kảñ sát gùng lòt- Kwang àng càr Dăk Nông pà gĭt, mpồl neh rcang lài kờp sền, sồr gơnoar atbồ ală lơgar mờ ală gah lơh broă geh gơnoar mut lơh bal, sơlơ tơnguh tai broă lơh mblàng yal, yal tơngĭt adat boh lam, sơlơ tơnguh tai broă lơh lòt sền, gròi sền lơh glài cau lơh tìs rơndăp tăp sèng lơngap lơngai gùng lòt, lam lơh srơh jơh gùt làng bol tus bal sền gŏ, yal jơnau yal ală broă lơh tìs bè rơndăp tăp sèng lơngăp lơngai gùng lòt.