VOV4.K’ho- Ngai do 22/08, rlau 1 tơlak 900 rbô nă kơnòm bơsram ơdŭ 1 tàm jơh gùt lơgar ngan ngồn lòt bơsram. Wă rò kơnòm bơsram lòt bơsram wơl, ală hìu bơsram ndrờm sơlơ kờp sền wơl ală bơta phan bơna bè gùng che đèng, ding dà, kƀàng, cơghê̆, kai ntùng, chi puh đèng...nàng kờñ sền gàr ờdo ờdă ai kơnòm bơsram in, rơcăng pleh rềs àr sồt să. Jăt broă rơndăp lơh nam bơsram pa 2022- 2023 gơwèt mờ bơto bơtê mầm non, bơh ơdŭ 1 tus ơdŭ 12 mờ bơto bơtê sùm geh Ƀộ Giáo zụk mờ Đào tạo ai lơh jăt ngai 05/08, sơnđờm mŭt nam bơsram pa geh lơh tàm ngai 05/09 bè ală nam sơl.

Kơnòm bơsram geh lòt bơsram gờñ ngan rlau jơh lài dùl poh, hơ̆ là tàm ngai 29/08. Mìng is gơwèt mờ ơdŭ 1, ală hìu bơsram gơtùi bơyai lơh lòt bơsram gờñ rlau mờ ngai sơnđờm mŭt nam bơsram pa bàr poh, hơ̆ là ngai 22/08. Ală càr, ƀòn dờng, bè: Hà Nam, Hải Dương, Hậu Giang, Hoà Bình, Bến Tre, Dăk Nông, Đồng Tháp, Đồng Nai, Bắc Giang, Hà Nội, Bắc Kạn, Bắc Ninh, Bạc Liêu, Lai Châu, Lâm Đồng...geh wă rò kơnòm bơsram ơdŭ 1 tàm ngai do 22/08.

Cau mblàng Lơ Mu K’Yến