VOV4.K’ho- Di dơ̆ tơngkah kir sơn rai 132 nam Ngai deh Củ tịc Hồ Chí Minh, 111 nam ngài Bác Hồ lòt jòi gùng tơngklàs dà lơgar, mho ngai 18/05, Thàñ ủy ƀòn dờng Hồ Chí Minh bơyai lơh dơ̆ jờng rơ cau dùl nă să is, mpồl cau geh cồng nha jak ngan tàm broă bơsram mờ lơh jat ƀồ tơngoh, nùs nhơm mờ rài kis Củ tịc Hồ Chí Minh dê nam 2021-2022.

Ƀí thư Thành ủy ồng Nguyễn Văn Nên jàu bằng khen ai ală cau dùl nă să is mờ mpồl cau pơn rơ jak in

Đơs tàm dơ̆ jờng rơ, Ủy viên Ƀộ Cíñ trị, Ƀí thư Thành ủy ƀòn dờng Hồ Chí Minh ồng Nguyễn Văn Nên đơs, 142 mpồl cau mờ 213 nă cau dùl nă să is geh sac rơ wah bơh gĭt nđờ rơbô nă cau krơh pơ rơ niam tàm broă bơsram, lơh broă sa tă pơgồp dà kơl hề tàm uă gah tàm rài kis mpồl bơtiàn dê. Do là ală cau geh krơh niam ngan, ngăc ngar, khin kơlôi, khin lơh, tryang tryồng lơh broă, jơh nùs jơh tồr mờ broă lơh bơh he dê, sùm khin kơlôi, khin mut lơh broă mờ khin kong kơnòl tàm broă lơh jat broă lơh dà lơgar bơh he dê.

Cau mblàng K’Hạnh