VOV4.K’ho- Kụk Kảñ sát gùng lòt pà gĭt, tàm 04 ngai ơm rlô Dơ̆ lơh chờ ngai 02/09 (bơh ngai 01- 04/09), mpồl kảñ sát gùng lòt tàm jơh gùt lơgar gŏ mờ lơh glài rlau 40 rbô nă cau lơh tìs, lơh glài mờ priă rlau 60 tơmàn đong. Tàm 04 ngai ơm rlô Dơ̆ lơh chờ, jơh gùt lơgar gơlik geh 79 dơ̆ rềs àr gùng lòt, lơh 48 nă cau chơ̆t, sồt să 51 nă cau.

Tàm ală tŭ lòt sền, gròi sền gàr niam rơndăp tăp sèng ờdo ờdă lòt rê tàm gùng, mpồl Kảñ sát gùng lòt tàm gùt lơgar neh lòt sền, sền gŏ mờ lơh glài rlau 41 rbô nă cau lơh tìs; lơh glài mờ priă rlau 60 tơmàn đong; kŭp jàm ing 941 nơm rơndeh ô tô, 12 rbô 700 nơm rơndeh mô tô; kŭp rlau 6 rbô nơm sră măy rơndeh ală bơta. Mìng is bè broă lơh tìs ñô ơlak, ƀièr, mpồl Kảñ sát gùng lòt tàm jơh gùt lơgar neh lơh glài rlau 8 rbô 800 nă cau lơh tìs, lơh glài mờ priă mờr 40 tơmàn đong. Bơh ală anih jăt sền bơh ală Mpồl lòt sền gròi sền lòt rê tàm gùng rơndeh ô tô ntoăt răt gơwèt Kụk Kảñ sát gùng lòt neh gŏ mờ lơh glài 1 rbô 593 nă cau.

Cau mblàng Lơ Mu K’Yến