VOV4.K’ho- Bộ Giáo dục mờ Đào tạo pà gĭt, jơh bal 63 càr, ƀòn dờng neh bơyai lơh ai kơnòm bơsram ală kấp bơsram in lòt bơsram tơn. Khà kơnòm bơsram lòt bơsram tơn kờp tus ngai 18/4 geh 99,57%. Tơnơ̆ tŭ đơng lam pờ mpồng hìu bơsram tơn, kwang đơng lam bồ Bộ Giáo dục mờ Đào tạo neh lòt sền bơta lam lơh broă tàm ală tiah.

Ngan ngồn pà gŏ, geh lòt bơsram wơl là bơta kơ̆p kờñ dờng ngan bơh kơnòm bơsram, cau pơgru mờ mè bèp kơnòm bơsram dê. Ală tiah neh bơt bơtàu broă lơh, lơh broă, bơyai lơh pơlam tàp, rcang lài ală bơta mờ lơh ngan ai kơnòm bơsram in geh lòt bơsram wơl tàm hìu bơsram mờ bơsram sră ờdo ờdă. Ală Hìu bơsram drờm rcang lài kờp sền, sền swì, tam pà cồng nha bơsram sră tơn, bơh anih sơnio rùp bơh ală mpồl cau kơnòm bơsram dê nàng tam gơl broă rơndap lơh bơto bơtê bơh hìu bơsram dê di pal mờ bơta geh ngan mờ bơta gròi sền kòp Covid-19 tàm ală tiah. Bộ Giáo dục mờ Đào tạo pà gĭt, jat broă rơndap lơh bơh ală hìu bơsram, broă lòt sền, sền swì pah dơ̆ jat broă lơh tơn tàm hìu bơsram ndrờm geh lơh jat tơnơ̆ dùl tơngai kơnòm bơsram neh geh lòt bơsram wơl, lơh ngan, bơtơl tai tơngume gĭt wă.

Cau mblàng K’Hạnh