VOV4.K’ho- Tàm hìu lơh broă Cíñ phủ, Phó Thủ tướng ồng Vũ Đức Đam đơng lam pơrjum pờ tơlik tơn tàm internet gùt lơgar bè broă pờ mpồng hìu bơsram ală càr, ƀòn dờng. Đơs pơn dut tàm dơ̆ pơrjum, Phó Thủ tướng đơs nền: Broă lòt bơsram bơh kơnòm dềt dê là kuơmàng ngan, ờ di mìng tŭ geh kòp mờ kờp bal tàm tŭ ờ geh kòp. Kơnờm dềt ơm tàm hìu tàm tơngai jŏ jòng digơlan lơh gơbàn ală jơnau ờ niam gơ lời wơl ờ gơtùi git lài; ờ mìng bè niam chài, jơnau git wă, mờ gơ rềng jŏ jòng tus bơta dờng pràn kơnòm dềt dê tai.

Đal git rơcang sơndră kòp Kovid-19 là jŏ jòng, Phó Thủ tướng ồng Vũ Đức Đam đơs wơl nùs nhơm pal lơh wơl ală broă lơh bơtàu tơnguh lơh sa- mpồl bơtiàn tàm bơta bè ờs pa, mờ jơnau đơs gơ dờp ờdo ờdă, ngac ngar, gròi sền geh cồng nha kòp bơtờp. Phó Thủ tướng kung tơngkah lài ngan tus broă cit sơnơm vaccine rơcang sơndră kòp Kovid-19 ai kơnòm dềt bơh 5 tus 11 sơnam in. Bal mờ hơ̆, dờp bơta geh ngan là tŭ kơnòm dềt lòt bơsram dùl ròt den khà bơtờp kòp geh gơguh uă; kuơmàng là gơtùi sền gròi khà bơtờp, geh broă rơndap lơh bơsong cau F0, F1 dipal.

Cau mblàng K’Duẩn