VOV4.K’ho- Tơnơ̆ tŭ lòt sền ngan ngồn bè broă tơrluh ù tàm kơnhoàl Kon Plông, drim ngai 21/04, Mpồl lơh broă bơh Mpồl đơng lam Dà lơgar bè rơcăng sơndră trồ tiah lơh aniai neh geh dơ̆ lơh broă mờ Mpồl đơng lam rơcăng sơndră trồ tiah lơh aniai mờ lòt jòi dong kờl rềs àr càr Kon Tum. Jăt jơnau yal, bulah ờ hềt gơbàn hoàc hươr bè kòn bơnus kung bè jơtài, mơya ală dơ̆ tơrluh ù, gơ rơnggô ù tàm tơngai do neh lơh làng bol in kơlôi rơcăng ngan.

Jăt tàm bơta iăt kơno jơnau đơs tă pơgồp bơh gơnoar ătbồ kơnhoàl Kon Plông, càr Kon Tum dê mờ ala măt Ƀộ, ngàñ lơh broă geh gơnoar dê kung bè ală cau jak chài gah broă do, Mpồl lơh broă bơh Mpồl đơng lam Dà lơgar rơcăng sơndră trồ tiah lơh aniai neh đơs là, tềng đăp măt pal tơrgùm tàm broă kờp sền wơl ală bơta gơrềng mờ bơta gơ aniai ngan ngồn bơh ală dơ̆ tơrluh ù, rơnggô ù neh gơlik geh tàm ù tiah do dê. Pal lơh mhar mblàng yal, hòi jà dong kờl làng bol, gơnoar ătbồ kâp hơđơm gŏ jơnau pơhìn, bơta gơ aniai kung bè ală bơta gơrềng bơh tơrluh ù, rơnggô ù dê nàng rơcăng lài sơndră wơl mờ pleh.

Cau mblàng Lơ Mu K’Yến