VOV4.K’ho - Bal mờ broă kấp ủy, gơnoar atbồ drơng gàr satềp ai hìu nhă geh sră dong kờl bơh dà lơgar in, hìu rơƀah, làng bol ală kòn cau kis tàm Tây Nguyên kung neh rơcang wă rò satềp chờ hờp, hờm ram mờ sùm tơnguh nùs nhơm rơcang sơndră mờ kòp Kovid-19.

Rê satềp bal mờ hìu nhă bơh càr Bình Dương, lŏ Y Ngọc, kis tàm ƀòn Đăk Rơ Đe, xã Ngọc Bay, ƀòn dờng Kon Tum, càr Kon Tum cèng bal uă bơta chờ. Bal mờ mè mờ ală bi rơcang nha, che nàng klơm mbar, lŏ chờ hờp yal bè bơta chờ bơh să tờm dê mờ ală cau tàm hìu in. Jăt lŏ yal, bơta chờ ngan là gàr niam bơta pràn kơl dang să jan mờ ờ do ờ dă tềng đăp mờ kòp Kovid-19. Bơta chờ tai là lơh công nhân tàm càr Bình Dương priă nhai ring niam bơh 9 tus 12 tơlăk đong, broă sào sa pah nhai mìng geh Kông ty drơng den tàng kung geh prăp priă nàng cèng rê dong kờl mè tàm hìu. Bơta chờ dờng rơlao jơh là dơ̆ rê satềp nam do, lŏ Y Ngọc gam cèng bal bi A Nghen, cau lơh broă bal tàm Kông ty rê nàng tơlik măt mờ cau tàm hìu, mờ rơcang geh bơyai lơh jun bao di tàm nam pa do. Bal mờ bơta chờ rơcang wă rò satềp hìu nhă tờm bal mờ cau tàm ƀòn Đăk Rơ Đe dê, lŏ Y Ngọc pà git: “Di lah lơh ngan jŏ jòng tàm kông ty den priă nhai añ dê sơlơ gơguh tai, broă sào sa neh geh kông ty drơng. Lòt lơh broă jơh ngai, trồ mang di lah geh lơh tai broă den kung geh tai priă sơl. Nam pa do, añ neh prăp geh ờ uă priă, geh priă blơi phan chờ wă rò satềp nam pa. Tơnơ̆ mờ satềp añ geh lòt lơh broă tai, di lah kòp gơtờp tàm hơ̆ gam kal ke den jòi broă lơh tàm càr do, nàng geh broă lơh, geh priă nàng geh rài kis ring niam rơlao”.

Mờ làng bol kòn cau Rơđê kis tàm kơnhoàl Krông Ana, càr Dăk Lăk, rơcang wă rò satềp là broă lơh pal geh tài cau lơi kung kơ̆p kờñ nam pa cèng geh uă bơta chờ hờp. Mò H’ Ñê Niê, kis tàm ƀòn Kla, xã Dray Săp, kơnhoàl Krông Ana, càr Dăk lăk yal: “Lài do, tŭ mŭt tàm nhai 2 cau geh sa rơpu, kơnrồ, tàm dơ̆ hơ̆ kung wă năc bơh ngài tus còp ƀòn lơgar. Tŭ do satềp tus, làng bol, bol añ kung rơcang satềp bè phan sa, pơs wàs kloh niam hìu đam nàng wă năc tus chờ gờm nam pa. Tàm nam pa añ kơ̆p kờñ geh bơta pràn kơl dang, geh lòt còp oh kòn, kòn sao tàm gùt tiah, tus bal mờ ală broă lơh mpồl bơtiàn”.

Satềp nam pa tus là cau ơruh pơnu, bi Hyim, kis tàm ƀòn Kon Brung, xã A Yun, kơnhoàl Mang Yang, càr Gia Lai kơ̆p kờñ nùs nhơm chờ hờp ngan. Jăt mờ hơ̆, Hyim neh rơcang priă blơi ờ uă ào, mpha pa ai ală cau tàm hìu nhă in, blơi bañ, kèo, phan sa bal mờ bơkào satềp nàng bơka hìu. “Wă rò satềp den kung geh rơcang ờ uă phan ngui. Mờ tàm nam pa den hìu nhă kung cri bơyai bal bè broă lơh sa, lơh broă nàng geh priă, blơi ào, npha oh kòn in, blơi phan ngui tàm hìu nhă, bè phan sa, dà hùc, poăc, ka... nàng ngan satềp geh chờ”.

Rơcang cang satềp ai hìu nhă tờm in, mơya kung gam pal rơcang mpồl bơtiàn in tai. Hơ̆ là gùng dà broă lơh bơh ală cau tam biăp tàm kơnhoàl Đơn Dương, càr Lâm Đồng dê. Kàl biăp satềp nam do geh tơnhào uă mờ geh priă tăc, ai tơl phan nàng drà kă bro in, den tàng hìu lơi kung geh priă uă, geh priă nàng blơi ală phan ngui wă rò satềp nam pa do. Ồng K’ Điếp, kis tàm xã Lạc Lâm, kơnhoàl Đơn Dương, càr Lâm Đồng đơs: “Hìu nhă añ tam biăp jăt broă lơh kông nghệ kao tàm hìu krơh, hìu jàl nàng ai drà kă bro in di tàm satềp. Nàng broă tam biăp geh cồng nha, tơl kloh niam, ờ do ờ dă, añ tài kơnờm mờ broă tus bal pơrjum cri bơyai, kơnờm mờ kwang bàng kỹ thuật lam sồr, bơh tŭ hơ̆ añ git tàm broă tam biăp mờ sih phơng bè lơi di pal, geh cồng nha. Kơnờm mờ hơ̆, suơn biăp hìu nhă añ geh cồng nha uă, cồng nha broă lơh sa geh uă, geh drà kă bro dờp den tàng tăc geh priă ai hìu nhă in di tàm satềp”.

Cau mblàng Ndong Brawl