VOV4.K’ho - Anih lơh broă sùm Mpồl đơng lam Dà lơgar bè rơcang sơndră mờ rềs àr bơh trồ tiah pa geh sră nggal pơyoa tus Mpồl đơng lam rơcang sơndră mờ rềs àr bơh trồ tiah mờ jòi dong klàs cau gơtìp rềs àr ală càr, ƀòn dờng bơh càr Thừa Thiên Huế tus càr Khánh Hoà mờ Tây Nguyên bè broă rơcang sơndră mờ mìu dờng, càl pồt pràn, kơnàs, mìu piar, dà tih dà cò, tơrlah ù.

Tơngu me sră nggal sồr ală càr, ƀòn dờng pa yal tơrgùm tơmù ală hoàc huơr bơh trồ tiah tàm tiah tàm gùl lơgar di jăt mờ jơnau đơng lam bơh Thủ tướng Cíñ phủ tàm jơnau sồr số 298. Pơn jăt tai bơyai lơh sền gròi nền nòn rềs àr, đơng lam, lơh jăt ală broă rơcang sơndră di tŭ nàng tơmù ờ uă ngan hoàc huơr, tàm hơ̆ tơrgùm lơh jăt. Ai mpồl lam lài tus sền, sền wơl ală ƀòn kis jăt gah dà dờng, dà croh, tiah di gơlan gơtìp gơbam tàm dà, dà cò, tơrlah ù nàng rơcang bơyai lơh ntrờn làng bol tŭ geh bơta gơtìp. Sền wơl, rơcang sơndră, sền gàr broă lơh sa suơn sre...

Cau mblàng Ndong Brawl