VOV4.K’ho - Cơl dŭ duh broă sùm Mpồl đơng lam Dà lơgar bè rơcang sơndră mờ rềs àr bơh trồ tiah lơh aniai pa geh Sră nggal pơyoa tus Mpồl đơng lam rơcang sơndră mờ rềs àr bơh trồ tiah mờ jòi dong klàs cau càr Kon Tum mờ ală Ƀộ: Nông nghiệp mờ Phát triển Nông thôn, Kông thương; Tập đoàn Điện lực Việt Nam; Viện Vật lý Địa cầu bè broă rơcang sơndră mờ tơrluh ù tàm càr Kon Tum.

Jăt jơnau yal tơrluh ù bơh Viện Vật lý Địa cầu, Viện Hàn lâm Khoa họk Việt Nam, ngai 23 nhai 8 neh pơn jăt tơn gơtìp 4 dơ̆ tơrluh ù tàm kơnhoàl Kon Plông, càr Kon Tum, tàm hơ̆ geh dơ̆ tơrluh ù pràn 4,7 độ richter, bơta rềs àr bơh trồ tiah lơh aniai kấp 1. Nàng rơcang sơndră, tơmù ờ uă ngan hoàc huơr bơh tơrluh ù di gơlan lơh aniai, Cơl dŭ duh broă sùm Mpồl đơng lam dà lơgar bè rơcang sơndră mờ rềs àr bơh trồ tiah lơh aniai neh sồr Mpồl đơng lam rơcang sơndră mờ rềs àr bơh trồ tiah lơh aniai mờ jòi dong klàs cau gơtìp rềs àr càr Kon Tum, ală Ƀộ, gah lơh broă bal mờ ală anih lơh broă gơrềng bal sền nền nòn broă gơrềng bal, bal mờ bơta aniai bơh ală dơ̆ tơrluh ù neh lơh gơtìp gơwèt mờ hìu ơm làng bol dê, hìu lơh broă, hìu bơsram bal mờ ală broă lơh ndai nàng di tŭ gŏ, tơmù ală bơta ờ niam, nàng gàr niam ờ do ờ dă kòn bơnus bal mờ phan bơna in; tŭ lơi kung rơcang lài cau lơh broă, phan lơh broă, rơndeh nàng sơndră mờ tơmù hoàc huơr di tŭ, di lah geh bơta gơtìp lơh aniai.

Cau mblàng Ndong Brawl