Ngai do (26/07), Dơ̆ ies tơ̆p ƀồc ồng Nguyễn Phú Trọng pơn jăt tai geh bơyai lơh tàm Hìu ies tơ̆p ƀồc Dà lơgar hìu sồ 05, gùng Trần Thánh Tông, ƀòn dờng Hà Nội sơn đờm bơh tŭ 07 jơ drim tus 01 jơ mho. Dơ̆ kah pơlai ƀồc ồng Nguyễn Phú Trọng geh bơyai lơh tàm tŭ 01 jơ mho ngai 26 nhai 07 nam 2024 tàm Hìu ies tơ̆p ƀồc Dà lơgar hìu sồ 05 gùng Trần Thánh Tông, ƀòn dờng Hà Nội mờ dơ̆ tơ̆p geh bơyai lơh tàm tŭ 03 jơ mho ngai bal tàm Ƀlàng tơ̆p ƀồc Mai Dịch, ƀòn dờng Hà Nội.

Mpồl bơyai lơh Ies tơ̆p ƀồc Dà lơgar Tổng Ƀí thư ồng Nguyễn Phú Trọng pà git, bơh 07 jơ drim tus 07 jơ mang ngai 25 nhai 07 neh geh 1 rơbô 560 Mpồl (mờ di pơgăp 55 rơbô 600 nă cau), là ala măt kwang đơng lam Đảng, Dà lơgar, ală gah, ƀộ lơh broă dà lơgar, mpồl lơh broă, ală càr, ƀòn dờng, ală mpồl ling bal mờ làng bol, ală mpồl kwang bàng cribơyai broă mờ lơgar ndai, ala măt ală mpồl lơh broă bal mờ gơ̆p bơyô bơh ală lơgar, làng bol neh tus ies, pơyoa goàng bơkào, tam pà bal moăt jrùng mờ cau tàm hìu nhă Tổng Ƀí thư ồng Nguyễn Phú Trọng, tàm Hìu ies tơ̆p ƀồc Dà lơgar hìu sồ 05 gùng Trần Thánh Tông ƀòn dờng Hà Nội. Hìu pơrjum dờng Thống Nhất, ƀòn dờng Hồ Chí Minh mờ ƀòn tờm Tổng Ƀí thư ồng Nguyễn Phú Trọng tàm thôn Lại Đà, xã Đông Hội, kơnhoàl Đông Anh, ƀòn dờng Hà Nội.