Jơnau yal bơh mpồl kwang bàng jăt sền pà gŏ, kờp jơh priă hòi jà drơng broă sơndră mờ kòp Kovid-19 là rơlao 236 rơbô tơmàn đong. Tàm hơ̆ kes priă dà lơgar là rơlao 189 rơbô tơmàn đong, hòi jà bơh ală gah dong kờl là rơlao 47 rơbô tơmàn đong.

Neh geh git nđờ tơlăk nă cau lơh broă dong kờl is, tàm hơ̆ uă ngan là mpồl kwang bàng lơh sơnơm, mpồl ling tus tơn tàm tiah sơnrờp tam dră mờ kòp gơtờp. Ală làng bol, mpồl bơtiàn mpồl lơh sa kă bro, ală mpồl lơh broă dunia tă pơgồp bơta pràn, priă, phan. Củ tịc Quốk hội ồng Vương Đình Huệ sồr mpồl kwang bàng jăt sền yal loh broă tơm priă ală gah tàm dơlam mờ bơdìh lơgar, lơh loh gam nđờ priă ờ hềt tơm jơh, nđờ priă ờ hềt tă, geh gơtìp hoàc huơr, tìs lơi? Khà sơnơm vaccine jơnkah, jŏ ir tơngai mùl màl là kàr lơi.