VOV4.K’ho- Lơh jăt srơh “Rơnàng kơnòm să bơsram mờ lơh jăt krơh bồ tơngoh, nùs nhơm, broă lơh mờ rài kis Hồ Chí Minh dê”, tàm tơl broă lơh he dê, đoàn viên ơruh pơnu càr Dăk Lăk sùm jơh nùs bơsram tàp, ròng gàr să tờm mờ lùp bơsram bơh Wa Hồ tàm tơl broă lơh pah ngai.

Là dùl nă kwang bàng đoàn ơruh pơnu tàm xã tiah pôs đồng kăc màng dê, bi Đỗ Hữu Phong, Phó Ƀí thư Đoàn xã Cư Pui, kơnhoàl Krông Bông, càr Dăk Lăk sùm kơlôi sơnơng sùm lơh bè lơi nàng lơh sir niam kơnòl broă geh jàu, tam klăc bal, bơtòm tơrgùm ơruh pơnu tus bal bơtàu tơnguh lơh sa- mpồl bơtiàn, bơ̆t bơtàu thôn ƀòn ngai sơlơ gơguh jak. Bi Phong yal: bi lơh ngan bơsram jăt Wa Hồ nùs nhơm lơh krơh, “đơs pal gơ jăt bal mờ lơh”. Ngan tài bè hơ̆, tàm uă nam do, ờ mìng tơryăng tơryồng tus bal lơh broă đoàn, bi gam jơh nùs ngan bơtàu tơnguh lơh sa hìu bơnhă, ròng siam tai sur, tam tai uă tờm chi sa plai nàng tơnguh tai priă lơh geh. Ai bơta mờng chài bơh să tờm dê nàng tam pà bal mờ ală đoàn viên ơruh pơnu ndai in, bi kung sền gròi sơl tus ală ơruh pơnu là cau kal ke, hìu bơnhă cíñ săc, hìu bơnhă rƀah, dong kờl khi in bè bơta chài, dong kờl lòt càn ală bơnah priă càn ờ sa priă cồng uă nàng dong khi bơtàu tơnguh lơh sa. Bi Đỗ Hữu Phong yal: Să tờm añ kung dờng pràn bơh srơh Đoàn, bơh tàp pràn să jan sơl den kung lơh geh ală anih nhơl ai đoàn viên, ơruh pơnu tàm do in. Mờ bơta sơnrờp den añ kung pal là cau lòt lài tàm broă tam gơl rơndăp tăp sèng chi tam nàng bơtàu tơnguh lơh sa, nàng ai đoàn viên in lùp bơsram.

Broă bơsram mờ lơh jăt Wa Hồ geh rơnàng kơnòm să càr Dăk Lăk lơh jăt ngan ngồn bơh ală broă lơh geh ngan

Ai gơwèt mờ bi Đỗ Thị Thanh Trang là ƀak sĩ kơnòm să gam lơh broă tàm Hìu sơnơm kơnhoàl Cư Mgar, den broă bơsram mờ lơh jăt jơnau Wa Hồ dê geh đòm jăt tơn bơh tàm broă lơh pah ngai. Mờ kơnòl broă “nùs nhơm cau lơh sơnơm lơbơn niam bè cau mè sơl”, bi sùm lơh ngan sền gàr pràn kơldang să jan ai cau kòp in. Ờ mìng tơryăng tơryồng jơh nùs jơh tồr ngan tàm kơnòl broă broă lơh ờs mờng, bi Trang gam jơh nùs ngan tàm ală broă lơh tài bơh mpồl bơtiàn. Bi tŭ do là Ƀí thư Ci đoàn Hìu sơnơm kơnhoàl Cư Mgar, cau tàm Mpồl Cau lơh sơnơm kơnòm să kơnhoàl dê. Bulah tŭ tơngai lơh broă ờ ru ngan mơya bi kung gam rơndăp sơl tŭ jiơ nàng tus bal tàm ală dơ̆ lòt tus hờ ƀòn lơgar, kham kòp, pà sơnơm ờ sa priă ai làng bol tàm ală ƀòn lơgar tiah sar lơgar ngài in. Bi Đỗ Thị Thanh Trang, yal: Oh rê lơh broă tàm anih lơh broă do di 10 do rao den kờp bal di dùl nam den Mpồl Cau lơh sơnơm kơnòm să kơnhoàl Cư Mgar dê bơyai lơh êt ngan kung là bơh 2 tus 3 dơ̆ lòt kham kòp làng bol in tàm ală ƀòn lơgar tiah sar lơgar ngài. Den ndrờm bè jơh ală dơ̆ oh ndrờm lòt lơm. Oh gŏ gơlơh chờ hờp ngan tŭ he lơh broă tàm gah lơh sơnơm mờ broă bơsram mờ lơh jăt krơh bồ tơngoh, nùs nhơm, broă lơh mờ rài kis Hồ Chí Minh dê den geh oh lơh jăt tơn pah ngai tàm ală tŭ mờ he lòt kham kòp halà sền gàr cau kòp kung ndrờm bè ală tŭ mờ sùm bơsram tàp, ròng gàr să jan, tơnguh uă bơta ngac ngar jak chài tàm broă lơh ờs mờng, lơh bè lơi nàng ngai sơlơ geh di bơta niam nùs bơh cau kòp dê.

Ƀak sĩ Đỗ Thị Thanh Trang (đah kiau) tus bal lơh broă dong kờl is kham kòp làng bol in

Lơh jăt Jơnau sồr sồ 05 bơh Ƀộ Cíñ trị dê bè pơn jăt tai lơh pràn broă bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê, tơngai do, ală mpồl đoàn tàm Dăk Lăk neh lơh jăt ngan ngồn bơh uă broă lơh geh ngan. Ală broă lơh, bè: “Lơh broă dong kờl is kàl mrềt”, “Bồ sơnam pa lơh broă dong kờl is”, “Nhai Ơruh pơnu”, “Broă lơh ơruh pơnu lơh broă dong kờl is kàl rlô bơkang”, “Dong kờl lòt bơsram”, “Cau lơh sơnơm kơnòm să lơh jăt jơnau Wa Hồ dê, lơh broă dong kờl is tài pràn kơldang să làng bol in”, “Ngai chờ añ gơboh Dà lơgar añ” geh lam lơh geh cồng nha, lơh sùm pah nam neh gơhòi gơ jà uă ngan đoàn viên ơruh pơnu tus bal.

Broă mblàng yal bè srơh geh lam lơh jrô ơnàng làm uă. Tàm ală anih neh geh lơh uă dơ̆ pơrjum nàng gĭt bè krơh bồ tơngoh, nùs nhơm, broă lơh mờ rài kis Hồ Chí Minh. Ală “tùh sră Wa Hồ” geh lơh gơs nàng dong đoàn viên ơruh pơnu mờ kơnòm bơsram geh tai sră nggal nàng sền kờñ gĭt bè rài kis, hìu bơnhă mờ broă lơh Wa Hồ dê. Bơh hơ̆ geh ală krơh pơnrơ, pơnrơ ngan tàm broă bơsram mờ lơh jăt jơnau Wa Hồ dê. Bi Phan Thị Trinh, Phó Ƀí thư Tỉñ đoàn Dăk Lăk đơs, bơh srơh, broă bơsram mờ lơh jăt Wa Hồ neh gơ gơs là broă lơh sùm, geh lơh gơrề tus ală đoàn viên ơruh pơnu tàm càr. Bi Phan Thị Trinh, đơs: Broă bơyai lơh ală broă lơh tàm pơrlòng gơ jăt bal tàm broă bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê nàng lam lơh jăt ală tơngume, ală srơh kăc màng dê. Geh uă ngan tơngume, uă broă lơh geh ală oh mi tàm ƀòn lơgar lam lơh, tus bal sồr lơh, lam lơh jăt geh cồng nha nàng ai ală broă lơh, srơh in ngai sơlơ bơtàu tơnguh rlau tai.

Bi Đỗ Hữu Phong (đah ma) jơh nùs jơh tồr ngan, lơh krơh “bơr đơs tê lơh tơn” tàm ală broă lơh, srơh đoàn dê

Mờ broă mblàng yal jrô ơnàng làm uă, sùm sùm, srơh “Bơsram mờ lơh jăt Wa Hồ” neh dong ală đoàn viên ơruh pơnu, kơnòm bơsram tàm càr Dăk Lăk gĭt wă jrô ơnàng rlau bè ală tơngume tờm mờ bơta kwơ dờng ngan bơh bồ tơngoh, nùs nhơm, broă lơh mờ rài kis Hồ Chí Minh dê. Bơh hơ̆ lơh gơlik bơta tam gơl pràn kơldang tàm broă bơsram tàp, ròng gàr, bơsram mờ lơh jăt ală bơta mờ Wa Hồ bơto bơh ală broă lơh loh làng, geh ngan pah ngai.

Cau cih H’Xíu H’Mốc- Cau mblàng Lơ Mu K’Yến